Lafaek News–Klibur Juventude Foinsa’e Timor Leste (KJFSTL), halibur juventude sira hodi transforma lixu nakfilak ba ai-funan lori ba merkadu inklui diminui aifunan inventadu husi rai-liur.
Fundadór, organizasaun Klibur Juventude Foinsa’e Timor Leste, Alexandrino Menezes haktuir atividades ne’ebé durante ne’e sira hala’o iha grupu maka rekoila lixu hirak ne’ebé ema soe lemo-lemo, sira halibur hamutuk hodi transforma fila-fali sasán ne’ebé iha valor ekonomia.
Ami halibur lixu hodi transforma ba ai-funan, kuda ai-oan hodi salva inundasaun, ami hala’o iha grupu ne’e no-mos halo asaun karidade no-mos formasaun ba joven sira,” Alexandrino Menezes Jornalista Lafaek News iha Kaikoli, kinta (10/02/22).
Nu’udar joven ida nia hakarak halibur maluk juventude sira, tanba foinsa’e barak agora abandonadu ho razaun no preukupa ba moris aban bainrua sai oinsá, ho razaun hirak ne’e grupu ne’e halibur joven sira seluk hodi aprende buat balun ne’ebé iha valor ba moris.
Ha’u halibur joven sira tanba joven barak hanoin maka abadona hela entaun iha ne’e ha’u halibur ema la’os iha atividade kreativu de’it, maibé iha mos formasaun ba edukasaun non-formal nian, tanba iha grupo ne’e ema barak mai ho matenek ne’ebe la hanesan,”dehan Nia
Maneira ne’ebé grupu halo aifunan mak hanesan presuza aqua mamuk, plástiku no sasan seluk ne’ebe transforma fali ba ai-funan sira fa’an fila-fali hodi hetan osan, no osan ne’ebe hetan husi aifunan ne’e rai hamutuk hodi responde ba membru organizasaun ne’e nia difikuldades.
Iha fatin hanesan estudante husi Universidade Nasional Timor Loro sa’e (UNTL), Maria Madalena Soares, sente kontente loos, tanba nia bele aprende buat barak husi grupu ne’e, no buat ne’ebe nia aprende iha grupu refere sei aplika fali iha sosiedade.
Ha’u orgullu tebes, tanba Ha’u mai inklina an iha grupo ne’e, ha’u aprende buat barak husi sira nia kreatividade,Ida ne’e hanesan dalan Ida atu motiva ha’u oinsa buat ne’ebe at Ita promove sai fali valor osan, ha’u sei aplika fali iha hau nia sosiedade ,” katak nia.
Jornalista : Domingas Viana
Editor : Agapito de Deus
