Lafaek News–Dekanu Fakuldade Siénsia Sosiais (FCS), Universidade Nasionál Timor-Lorosa’e (UNTL), Camilo Ximenes hatete, da-daun ne’e nia luta hela atu husu Reitór UNTL, posibilidade Universidade iha nia rádiu no televizaun rasik.
Ha’u hanoin hela ida ne’e no luta hela magnífiku Reitór sé iha posibilidade Universidade Nasionál iha nia rádiu no televizaun rasik, tanba ita nia fasilidade sira kompletu hotu, hanesan mákina ne’ebé hasai foto, ita mós iha poténsia para fó formasaun ba Timoroan sira ne’ebé mak atu sai Jornalista, ha’u hanoin la dúvida sira atu ba liur nebá depois selu osan boot-boot, ” dehan Dekanu FCS Camilo Ximenes ba Jornalista sira hafoin partisipa serimonia agradesimentu Departamentu CS nian iha Kampus UNTL Kaikoli Dili, sabadu (05/02/2022).
Nia informa, falta tinan ida remata ona nia kargu, neduni nia husu ba se mak atu mai karik tenke kontinua mehi ne’ebé ema hotu hakarak.
Tanba ita haree Fakuldade Siénsia Sosiais, Departamentu Komunikasaun Sosiál mesak joven sira ne’ebé iha talentu, joven sira ne’ebé mak iha produtividade prontu atu servi,” informa Dekanu FCS.
Dekanu ne’e akresenta, sira laos de’it iha rádiu no televizaun maibé barak liu mak akompaña partidus politikus no sai mós Jornalista ba partidus politikus sira.
Tanba ne’e ha’u nu’udar Dekanu iha Fakuldade ida ne’e, ha’u laiha dúvida ba formandu no Finalista sira iha departamentu Komunikasaun Sosiál,” hakotu Dekanu FCS Camilo Ximenes.
Rezultadu husi Departamentu Komunikasaun Sosiál ne’ebé avalia husi Ajénsia Nasional Avaliasaun no Akreditasaun Akadémiku (ANAAA) iha tinan 2021 liubá akreditadu ho valór B.
Jornalista : Juvita dos Santos
Editor : Agapito de Deus
