Lafaek News–Carlito Marcos Soares kodigu “Dron Asli” husi moris iha Dili 20/03/1955, partisipa funu durante tinan 24, ba da-daun ho kondisaun moras struk no sente laran moras governu la preokupa.
Dron Asli haktuir istoria moris, Iha tinan 2001-2002 nia hanesan pesoal seguransa iha embaixadór Japaun iha Dili kondisaun di’ak hela, iha fali 2003 mak nia deside tenke para servisu tanba ninia kondisaun hahú ladun di’ak ona, nune’e iha uma de’it durante 20 nia laran.
Ha’u nia moras ne’e tama ona tinan 20, la iha governante ida mak mai haree direita Ha’u nia kondisaun ne’ebe agora ha’u sente hela, maibé maluk beteranus balu mak mai haree Ha’u,” dehan veteran Dron Asli iha nia rezidénsia Bebora Dili foin lalais ne’e.
Veteranu Dron Asli esplika, kondisaun hanesan ne’e mósu dezde iha tinan 2003, tanba nia hetan operasaun iha kelen-hun, bainhira nia hakat pasu ba oin, presiza beioan sira kaer liman, maibé nia la presija kadeira roda, tanba lakohi tuir bei-beik maibé hakarak la’o bei-beik maske nei-neik.
Ha’u esforsu aan la’o nei-neik kuandu ita toman ona iha kadeira roda bei-oan sira dudu entaun ita lakoi la’o ona tanba ne’e, bainhira ha’u ba haris fatin ha’u nia ferik-oan mak kaer Ha’u nia liman la’o nei-neik to’o haris fatin, depois fila husi mós hanesan, tanba ha’u nia ain laran frasku rahun sei iha ne’e mak halo ain moras susar uituan atu la’o,” veteranu 24 ne’e haktuir.
Veteranu Dron Asli afirma, maske ho kondisaun moras struk, maibé durante ne’e nia faan pulsa no ninia kaben faan dosi-hudi (pisang goreng) iha estrada ninin, nune’e moris hanesan ema seluk, loron ida han dala tolu.
Tuku 10 kalan ferik oan hahu deut trigu tuku 02 madrugada ha’u nia ferik-oan komesa halo kabuar trigu ne’e depois maka sona halo sai ba dose too dader nia ba faan iha liur ha’u faan pulsa iha uma, viziñu sira sempre sosa entaun kada loron dala ruma nia hetan $.5.00 ou $.6.00,” nia dehan
Kona-ba nesesidade uma laran nia nia sente normal, tanba kada fulan ninia oan sira sempre haruka nesesidade bázika hanesan foos no mina hodi sustenta veteranu ne’e ho nia kaben nia moris loro-loron.
Iha fain seluk, Xefe Suku Motael Luis Antonio Candido Gusmão Viegas relata, veteranus balun ho kondisaun ne’ebe ladún di’ak, governu presiza tau-matan no konsidera netik Dron Asli nia luta durante 24, libertasaun rai ida ne’e, iha liberdade ne’e ema seluk moris kontente maibé balun hanesan Veteranu Dron Asli moris iha presaun ekonomia no saúde.
Iha ami nia suku ne’e balu too agora la hetan nia direitu hanesan Carlito ema veteranu agora nia mós hanesan familia vulnerável tanba, Carlito moras struk no mós nia alin nain rua no-mos nia oan-feto ida moras mental,” Xefe suku Motael Luis haktuir.
Antes ne’e lafaek News tenta komfirma Ministru Asuntu Konsellu libertasaun Nasional (MAKLN), Julio Sarmento da Costa “META MALI” no mós Sekretaria Estadu Asuntu Konsellu Libertasaun Nasionál (SEAKLN), Gil da Costa “Oan Soru” maibé tempu laiha tanba halo hela asuntu importante balun.
Jornalista :Orlando Magno
Editor : Agapito de Deus
