Lafaek News–Elsa Vicente Soares da Costa ho idade 47 hela iha aldeia Metin 1, suku Bebonuk Postu-Administrativu Dom-Aleixo, Munisipiu Dili moris ho kondisaun nesesidade la sufisiente no saúde mos ladun di’ak, obriga nia lao ain haleu kapitál Dili hodi husu ezmola osan no hahan ba estadu ho ema balun ne’ebé kbiit iha atu ajuda.
Elsa sofre hela moras asma hahú nia sei ho idade kiik to’o idade 47 da-daun, maibé la lakon vontade nafatin la’o ba mai hodi buka hahán sustenta nia oan sira, liu husi meius tane liman.
Moras mear asma no tensaun, moras ne’e hahú dezde ha’u sei kiik to’o agora, to’o tempu iis boot mai tuur mós ladiak, ha’u kuandu moras ona hau nia oan sira hanoin barak loos, aiiii ama la lao hanesan Ne’e ami susar, ami nia apa ami la laran metin, ami laran metin ba ami nia ama,” espresa Nia ho matanbeen ba Lafaek News iha nia Rezidénsia Aldeia Metin 1, suku Bebonuk foin lalais ne’e.
Elsa nia kaben mós ho idade 47, maibé moras mentál hahú dezde tempu Indonezia até agora, foin lalais Elsa nia osan laiha no susar ba hahan, nia ba husu iha Deonizio Babo fó osan hodi hola pulsa eletrisidade, mina, foos, ayam potong hodi haknauk.
Ita nia tiu ne’e moras mental, depois servisu laiha tan, forsa no kbiit laiha atu tangun oan ba eskola, ha’u hanesan hili lata, hili besi sustenta ba ha’u nia oan sira, depois iha forsa hau bele daftar hau nia oan ba eskola laiha forsa hau labele daftar,” informa Nia.
Elsa Vicente iha oan nain neen, kompostu husi feto lima, mane ida, feto na’in rua mak ema hakiak. Neduni hela na’in haat mak hela ho nia, nain ida forma ona uma kain, na’in tolu mak sei eskola.
Agora ha’u nia oan sira daftar osan laiha, ha’u hodi surat lao lemo-lemo fatin-fatin, no hau tama sai uma-uma ha’u sei buka hahan, ha’u sei buka osan, ba Delta Nova, ba Manleuana, Merkadu Lama, Pantai Kelapa sira ne’e, ha’u buka husu ezmola ba sira hotu tanba ha’u nia oan sira, kuandu ha’u lao sai entaun ha’u nia oan sira moris di’ak, ha’u la la’o sai ha’u nia oan sira ahi mate,” espresa Nia.
Elsa esplika, nia oan ne’ebé eskola hamutuk nain tolu, dadaun ne’e atu rejistu ba segundu ano, ida rejistu sétimu no ida seluk rejistu ba oitavu ano, mak osan laiha entaun nia halo karta ida ba Primeiru Ministru hodi atu husu osan oituan.
Nia hateten, dadaun ne’e nia presiza tebes osan atu rejistu nia oan ba eskola no sosa buku, lapizeira, pasta, sepatu no seluk tan,Edito segundu ano iha SD tingkat selu osan dollar $2 no ba nain rua ne’ebé hakat ona ba pré-sekundariu selu dolar $56.
Antes Jornalista Lafaek News hakat ba nia Rezidénsia iha Aldeia Metin 1, Lafaek News hasoru Elsa Vicente iha Palasio Governu. Iha momentu nia lori karta ida ne’ebé halo husi Xefe suku Bebonuk hodi hatama iha Gabinete Primeiru Ministru hodi hetan ajudus. Karta refere sei hein despaxu hafoin resposta.
Jornalista : Juvita dos Santos & Azelio da Cruz
Editor : Agapito de Dus
