Lafaek News–Governu liu husi reuniaun Konsellu Ministru (KM) aprova ona akordu ba projetu entre Timor-Leste no Ajénsia Kooperasaun Internasionál Korea (KOIKA) ba dijitalizasaun Sentru Nasionál Chega.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, tuir akordu ne’e, KOIKA sei hala’o kontribuisaun finanseira ida ho valór dolar amerikanu millaun lima atu harii sistema jestaun sustentavel ida ba Sentru Nasionál Chega nian.
Projetu ne’e ho objetivu atu hadi’a sistema prezervasaun arkivu no jestaun sentru nian, hodi estabelese Sentru Nasionál ida ba Edukasaun ho kualidade kona-ba Istória no Dame, sei dezenvolve módulu formasaun sira ba manorin sira istória nian,” dehan MPKM Fidelis Magalhães hafoin remata enkontru KM iha Palasio Governu Dili, kuarta (17/11/21).
Nia informa, objetivu seluk mak hakarak mós atu hametin kapasidade no parseria nasionál no rejionál sira ba rekonsiliasaun konflitu, harii dame no harii estadu ba dezenvolvimentu sustentavel, liuhusi organizasaun sorumutuk nasionál no internasionál ba rekonsiliasaun no harii dame.
Jornalista : Juvita dos Santos
Editór : Agapito de Deus
