Lafaek News--Governu liu husi reuniaun Konsellu Ministru (KM) aprova projetu rezolusaun governu kona-ba estratéjia Nasionál ba Protesaun Sosiál (ENPS) iha periódu tinan 2021 nian too 2030.
Ministru Prezidénsia no Konsellu Ministru, Fidelis Manuel Leite Magalhães hateten, objetivu aprovasaun estratéjia ida ne’e, atu promove evolusaun integrada husi sistema protesaun sosiál nian, hodi haluan kobertura hodi masimiza ninia impaktu iha hamenus ki’ak no vulnerabilidade.
Estratéjia ne’e mós atu konsolida direitu sira ba seguransa sosiál no ba asisténsia sosiál, no mós asesu ho forma ne’ebé inkluziva ba servisu sosiál, ba edukasaun no ba saúde. ENPS ne’e estabelese hanesan objetivu estratéjiku, hamenus ki’ak, hadi’a no haluan seguransa sosiál ba traballadór sira no dezenvolvimentu institusionál,” dehan Fidelis Magalhães hafoin remata enkontru KM iha Palasio Governu Dili, kinta (11/11/21).
Enkuantu projetu rezolusaun ne’e aprezenta husi Vise Primeira Ministra no Ministra Solidariedade Sosiál no Inkluzan Armanda Berta dos Santos.
Jornalista : Juvita dos Santos
Editor : Agapito de Deus
