Lafaek News—Organizasaun Naun Governamental Matan Dalan Institutu (MDI) Estevanus Coli, sorumutk ho Primeiru Ministru Taur Matan Ruak hodi koalia kona-ba politika implementasaun programa uma kbi’it laek no husu atu hasa’e tan unidade uma kbi’it laek iha nivel suku.
Tuir Diretór MDI Estevanus Coli, afirma, uma kbi’it laek ne’ebé implementa nia medida fó espasu di’ak ba maluk vulneravel sira, ida ne’e hanesan mekanizmu ida ne’ebé mak utiliza husi governu hodi valoriza no dignifika nia sidadaun sira.
“Ami konkorda ho politika ida ne’e no ami husu ba governu, ba parlamentu no sua eselénsia Prezidente Repúblika atu kontinua programa ida ne’e no se bele hasa’e liu tan unidade uma kbi’it laek iha nivél suku, agora dadaun implementa hela tolu no bazeia ba ami nia peskiza katak komunidade sira ne’ebé mak nia kondisaun vulneravel liu-liu ba hela fatin ne’e barak loos, di’ak liu governu no parlamentu bele hasa’e unidade boot liu, bele lima, bele sanulu, barak liu ne’e di’ak liu tan,” dehan Diretór MDI Estavanus Coli hafoin remata enkontru ho PM Taur iha rezidénsia PM Faról Dili, tersa (09/11/21).
Nia esplika, bazeia ba rezolusaun ne’ebé Programa Nasionál Desemvolvimentu Suku (PNDS) uza hodi implementa hari’i uma kbi’it laek ne’e politika ida di’ak loos atu responde ba komunidade vulneravel sira nia kondisaun moris liu-liu sira nia nesesidade abitasaun.
“Ami mós husu oinsa atu estabelese rejimentu ne’ebé mak fixa ba politika implementasaun uma kbi’it laek ba futuru nune’e bele garantia nia sustentabilidade,” nia imforma.
Enkuantu hatan ba asuntu ne’e Primeiru Ministru Taur Matan Ruak, dehan governu iha komitmentu nafatin atu kontinua programa uma kbi’it laek no programa sira seluk ne’ebé mak foka kona-ba abitasaun iha área rurál no área urbana.
Jornalista : Juvita dos Santos
Asisten Editór : Pedro de Almeida
