Lafaek News–Akontesimentu udan iha loron rua foin lalais, rezulta bee nalihun iha fatin vítima inundasaun loron 4 Abril liu ba kotuk ne’ebé sei kontinua hela iha fatin evakuasaun kampu Real Madrid suku Manleuana postu administrativu Dom Aleixo nakonu ho tristeza, inan oan nurak hamutuk 15 pasiensia hamriik de’it iha bee leten too udan para no bee mout ba rai okos, iha ne’ebé governu seidauk solusiona too ohin loron.
Vítima inundasaun iha kampu Real Madrid suku Manleuana triste tebes ho udan foin lalais durante minutu 30 de’it, udan been akumula sai bee nalihun iha lona okos ne’ebé vítima sira hela hela provizoriu nian, labarik sira sente la seguru, inan-aman ho emosional hodi haturun mata-wen ho nonok.
Koordenadór vítima inundasaun kampu Real Madrid suku Manleuana, José Abrao ba lafaek news hateten, horibainrua udan kuaze minutu 30, maibé intensidade la normal (udan-akompania ho anin), bee nalihun iha kampu real Madrid ne’ebe vítima inundasaun sira hela ba ne’e, inan oan nurak sira sente triste tanba laiha ona fatin alternativa ba sira atu hela hodi kuida labarik nurak sira.
Akontesimentu horseik ne’e udan ne’e bo’ot kuaze minutu 30 de’it iha kampu ne’e be’e nalihun vítima sira hela ba ne’e se, udan bo’ot lona ne’ebé vítima sira helane’e be’e tama hotu ba laran ,” afirma José Abrao
Tuir nia, akontesimentu udan ne’e vítima sira trauma, tanba anin huu lona ha’at balun at no be’e tama ba laran, nunee vítima sira hamriik de’it iha lona okos hodi kontrola sasan no vítima balun tenke halai sau liu husi lona okos husik hela labarik ho nia inan.
Lona haat mak horseik konsege be’e tama ba laran nune’e vitima Sira hamriik de’it iha lona okos hodi kontrola sasan no ba labarik Sira ne’ebe mak Kiik Nia inan Sira kous deit hamriik iha Lona okos Hau atu telfone ba media Sira atu Mai halo kobertura atu nain ulun sira hare’e, maibe laiha númeru telefone,” dehan Nia
Iha fatin hanesan vitima inundasaun, Anita Bernadina espresa ho sentimentu triste relasiona ho udan bo’ot foin lalais, kous nia oan kikoan hodi hamriik de’it iha lona okos durante oras rua ka tolu nia laran hodi hein bee mout ba rai okos.
Ha’u triste tamba desde dia 4 abril too Agora Fulan walu ona triste Liu Tamba ho Hau Nia oan foin tinan Ida neebe iha Lona okos nee labarik Toba ladukur Tamba Rai malirin Liu Hau Nia oan Hau kous hodi hamriik deit,” haktuir Nia
Observasaun Jornalista lafaek news nota iha terrenu, lona ba vítima inundasaun sira hela da-daun kuak no bainhira udan tau makas borus ba laran, no be nalihun husi rai halo familia sira book an la diak, liu ema sira ne’ebé ho oan nurak, familía uma Kain 48 mantein iha lona okos, kompostu husi inan oan nurak 15 ho inan isin rua nain 4, no uma kain 32 fila ba uma apropriadu.
Jornalista : Domingas Viana
Editora : Agapito de Deus
