Lafaek News—Governu Australia liu husi UNICEF iha Timor-Leste, apoiu Karreta 21 ba Ministériu Saúde (MS) hodi mellora servisu saúde iha Timor-leste.
Reprezentante Unicef, Bilal Durrani, informa kareta 18 sei uza ba apoiu monitorizasaun, supervizaun ba imunizasaun no maternidade no bebe foin moris, programa saúde infantil no distribuisaun produtu sira relasiona ho saúde husi nivel munisípiu ba sentru saúde primaria sira.
“Toyota Hilux 13 hodi apoiu imunizasaun no maternidade ba bebe foin moris no programa saúde labarik ba munisípiu 13, Toyota Hilux 2 ba programa imunizasaun sira iha Nasional no SAMES; toyota hilux 1 kaixa ferramentu ba departamentu biomedikal nivel nasional hodi apoia vasina no produtu sira relasiona ho saúde, formasaun, supervizaun no monitorizasaun, no kareta Truk Box Mitsubitshi 5 hodi apoia armazen servisu saúde rejional ou munisípal kona-ba distribuisaun produtu farmaseutiku husi servisu saúde munisipal ba fasilidade sentru saúde sira,” hatete reprezentante UNICEF, Bilal Durrani, iha palasiu das Sinzas Kai-koli, Tersa (19/10/2021).
Nia hatutan, ho fundus husi governu Australia UNICEF sei apoiu ministériu saúde nia programa imunizasaun, departamentu biomedikal no SAMES ba programa monitotizasaun no supervizaun inklui vasinasaun Covid-19.
Iha fatin hanesan Ministra Saúde Odete Maria Freitas Belo hatete, ho apoiu sira ne’e fiar katak Ministériu Saúde bele atinji lalais porsentu ba vasinasaun nian.
“Ohin ita hetan tan apoiu transporte balun husi governu Australia ne’ebé oferese ba ita liu husi UNICEF, no transporte sira ne’e sei fó ba iha fasilidades sira iha munisípiu sira hodi asegura vasinasaun ba iha fatin ne’ebé mak ita identifika tiha ona, nune’e sira la bele iha tan razaun katak transporte mak la iha,” dehan Ministra Saúde
Enkuantu transporte hirak ne’e sei oferese ba iha fasilidades sira iha Munisípiu 13, hodi transporta vasina ba iha komunidade sira.
Jornalista : Sandi Belo
Asisten Editór : Pedro de Almeida
