Lafaek News–Komunidade aldeia Riatoni suku Haupu postu administrativu Letefoho, munisipiu Ermera sente kontente tanba partidu Frente Mudanca (P-FM) utiliza osan subensaun publika ho montante $.2000 harii tanke bee moos hodi responde komunidade sira nia nesesidade loro-loron.
Ami sente kontente, dezde okupasaun Indonézia too ohin ami aldeia Riatoni ne’e kuru bee dook tebes, maibé ohin loron partidu Frente Mudanca mai harii tanke bee moos mai ami, ida ne’e ami sente hanesan milagre ida mai ami komunidade aldeia ne’e,’’ dehan komunidade aldeia Riatoni, Paulo Soares ba lafaek news iha Riatoni, sábadu foin lalais ne’e.
Iha ámbitu inaugurasaun tanke bee mos ne’e, Paulo hatoo sentimentu agradesimentu ba partidu Frente-Mudanca ne’ebé ho fuan boot hodi la’o tuir ain fatin saudozu sira ne’ebé mate tanba libertasaun patria, ohin tama ona iha libertasaun povu atu hasai povu husi kiak no mukit.
Paulo haktuir aldeia Riatoni area husi parte estrada leten dezde okupasaun Indonézia too ukun an tinan 19, susar tebes liu-liu bee mos, komunidade sira la’o tuun kuaze metru 500 resin hafoin too bee matan kuru bee hodi tutur sa’e ba uma.
Durante tinan barak ami kuru tun liu ba kraik kuaze metru atus lima resin foin too bee matan kuru hodi tutur sa’e fali mai, se la’o iha rai tetuk ne’e sei di’ak, maibé la’o tuun mak kuru bee depois tutur sa’e fali,’’ haktuir komunidade ne’e.
Maibé, ohin milagre ida husi maromak haraik liu husi partidu Frente-Mudanca, maske ho kadeira ida de’it, maibé utiliza osan subensaun públiku kadeia ida nian hodi halo mudansa uituan-uituan husi baze, nei-neik no bei-beik partidu Frente Mudanca sei halo duni mudansa ba rai doben ida ne’e.
Iha fatin hanesan, xefe aldeia Riatoni suku Haupu postu administratvu Letefoho, munisípiu Ermera, Julio de Deus, espresa nia sentimentu haksolok ba partidu Frente-Mudanca, bele ajuda ona nia komunidade iha aldeia refere.
Ha’u hatoo obrigadu boot ba partidu Frente-Mudanca, tanba bele ajuda ona hau nia komunidade Riatoni, tanba dezde okupasaun Indonézia too ukun an, partidu barak mak mai promete, maibé ikus mai nunka halo buat ida, ohin Frente-Mudanca mai halo tanke bee moos, hau konsidera hanesan milagre ida husi maromak haraik liu husi FM,’’ Julio afirma.
Entretantu, Prezidente Interinu Partidu Frente-Mudanca, Egidio de Jesus, hateten maske Frente-Mudanca ida de’it kadeira ida más iha responsabilidade ba kadeira ida ne’e nian nain no nain ba kadeira ne’e mak povu, tenke reskonese votu ne’ebe povu fo ba Frenta-Mudanca.
Nia dehan, bee mos ne’ebe partidu Frente-Mudanca fo la signifika Frente-Mudanca nia ema de’it mak utiliza, tanba bee obra maromak nian laiha, bee ne’e nia nain mak maromak, bee ne’e la haree ba kores partidu, maske partidu ketak-ketak, maibe bee ne’ebe Frente-Mudanca fo ne’e ba ema hotu-hotu.
Ha’u nia inan-aman sira iha fatin ne’e, iha partidu ketak-ketak, maibe bee ne’’e oferese ba imi hotu atu hemu, la signifika Frente-mudanca fo ba de’it nia militante, ne’e maromak bandu, se-se de’it bele hemu no utiliza ba nesesidade loro-loron, bee ne’ebe ami ofere a haree ba kor partidu, maibe ita hotu maromak oan presiza hotu nesesidade bee mos,” katak P-FM, Egidio de Jesus hafoin inagura tanke bee mos iha aldeia Riatoni suku Haupu postu Letefoho munisipiu Ermera.
Prezidente Interinu Frente-Mudança ne’e husu komunidade sira husu benefisiáriu atu utiliza bee ho kuidadu atu bele iha durasaun ba tempu naruk no husu komunidade bele utiliza bee ne’e la haree kor partidu, importante han isin sikat ruin, labele hamatak no labele bosok.
Jornalista : Agapito de Deus
Editór : Floriano Soares
