Lafaek News–Juventude aldeia Lemorai suku Villa-Verde postu administrativu Vera-Kruz, munisípiu Dili, promete liu husi akordu kultural evita instabilidade hodi hametin fali estabilidade kontribui ba prosesu dezenvolvimentu Timor Leste.
Reprezentante juventude aldeia Lemorai Gilberto Pinheiro dos Santos Soares, deklara hahú ohin loron 1 de Outubro tinan 2021 promete sei la halo tan asaun iha hirak ne’ebé la benefisiu ba prosesu dezenvolvimentu nasionál.
Ami promete hahu ohin loron 1 de Outubro tinan 2021, sei la repete tan asaun ida ne’ebé ami halo liu tiha ona, ami parte rua simu malu hanesan maun alin, lolo liman ba malu, dame hodi kria paz no estabilidade hodi asegura ami nia kompromisiu ida ne’e,” dehan Gilberto jornalista sira iha Sede Suku Vila-Verde, sesta 8/10/2021.
Iha fatin hanesan, Xefe Suku Villa-Verde, Abdul Mancoli Arranhado hateten, diálogu ne’e inisiativa husi autoridade lokál no Diresaun Nasionál Preventiva Konflitu Komunitária DNPKK, halo aproximasaun ho joven sira iha aldeia Lemorai iha ne’ebé sempre mosu konflitu.
Ami komu konsege ho DNPKK mak aproxima depois lori joven sira nia naran mai, ami bolu sira mai hotu, atu halo dialogo i ohin rejultadu final atu asina akordo,” katak xefe Villa-Verde ne’e.
Nune’e mós Xefe seksaun Rezolusaun Konflitu DNPKK, Evalina da Costa Guterres reforsa halo mediasaun ohin loron nian, diálogu ne’e hala’o bazeia ba kompriensaun husi juventude aldeia refere ne’ebé hakarak simu malu hodi hametin fali estabilidade.
Ita halo ona aproximasaun husi ekipa husi diresaun nasional preventiva konflitu komunitaria DNPKK, ne’ebé kopera ho autoridade lokal sira no mós PolKom Polisia komunitaria sira hala’o ona prosesu aprosimasaun prosesu negosiasaun ne’ebé ohin loron husi parte hirak ne’e prontu DNPKK atu halo akordu no Mediasaun ba sira nia kazu ne’ebé akontese liu tiha ona”, imforma Evalina da Costa Guterres.
Observasaun Lafaek News iha terenu nota katak prosesu diálogu ne’e hetan partisipasaun másimu husi juventude sira, autoridade lokal, komandante PNTL Eskuadra Vera-Kruz, Adminitrador postu Vera-Kruz, no komunidade sira.
Estajiada : Carla Borges.
Editór : Agapito de Deus
