Lafaek News—Inagurasaun turizmu komunitariu Malikeo, Laureadu Nobel da Paz José Manuel Ramós Horta sei konvida emabaixador sira iha Timor Leste hodi vizita no tau osan nune’e dezenvolve di’ak liu tan iha futuru oin mai.
Tuir koordenadór Turizmu Malikeo João Amaral esplika, dezenvolve fatin ida ne’e inisiativa joven sira husi uatulari afaloikai servisu hamutuk ho joven sira iha aldeia rai mean suku lahane oriental máka investe osan rasik ho montante rihun $17, no ba oin sei kontinua hadia fatin ne’e sai nabilan hodi atrai turista nasionál no internasionál sira.
“Orsamentu ne’ebé gastu ba fatin turizmu ida ne’e ami máka investe rasik ho montante rihun $17. Etapa ide ne’e la’os to’o iha ne’e de’it, maibé ba oin sei halo fatin ne’e furak no nabilan liu tan,” dehan koordenador Turizmu Malikeo João Amaral liu husi nia diskursu iha ambitu inagurasaun, sesta (01/10/2021).
Koordenadór hatutan, durante hari’i fatin turizmu malikeo hasoru problema oin-oin hanesan estrada, eletisidade no bee moos, maske nune’e joven sira kontinua buka alternativu oin-oin to’o hetan solusaun no ohin loron fatin fuik sai fatin ne’ebé nabilan ba ema hotu.
Enkunatu iha fatin hanesan Laureadu Nobel da Paz José Manuel Ramós Horta, hato’o parabens ba joven no komunidade sira, no sei konvida mós ministru turizmu komersiu no industria, eis presidente repúblika Kairala Xanana Gusmão, primeiru ministru Taur Matan Ruak no Embaixador hodi apoiu ba joven sira.
“Ha’u fila sei hasoru ministru turzimu para nia rasik mai iha ne’e, loron ruma ha’u sei dada avo Nana, primeiru ministru sei mai vizita purtantu fó apoiu ba joven ida ne’ebé brani halo fatin ida ne’e. Ha’u sei hatete ba embaixador sira iha atividade ami mai halo iha ne’e, no ha’u sei buka embaixada ruma mós lalin sira mai iha ne’e para hare’e no tau osan ruma hodi apoiu, tanba sira sei admira joven ida ho ita nia osan rasik halo turizmu ida ne’e, nemak ita tenke apoiu,” Horta imforma.
Nune’e mós xefe departamentu Turizmu Kultura, Julmira da Crus Sarmento, hatete, sei hato’o kreatividade joven sira nian ba Ministru Turizmu Komersiu no Industria atu bele apoiu no dezenvolve liu tan fatin turzimu malikeo.
“Ami la promete, maibé iha 2022 atu uituan ka barak tenke apoiu. Ha’u sei ba koalia ho Ministru Turizmu Komersiu no Industria atu bele apoiu turizmu komunitariu Malikeo,” dehan Julmira.
Entretantu turizmu malikeo lokaliza iha aldeia rai mean, suku lahane oriental, postu-administrativu kristru rei, munisípiu Dili, iha ne’ebé eventu inagurasaun ne’e partisipa masimu husi Laureadu Nobel da Paz José Manuel Ramós Horta, xefe departamentu Turizmu Kultura, Julmira da Crus Sarmento, Polisia Nasional Timor Leste, konvidadus sira, lideransa lokal no mós joven no komunidade rai mean rasik.
Ekipa Lafaek News
Asisten Editór : Pedro de Almeida
