Lafaek News–Diretór Ezekutivu Ospitál Nasionál Guido Valadares (HNGV) Alito Soares hatete, subsídiu ba liña frente saúde sira la hanesan, tanba bazeia ba sira nia kategoria servisu.

Pessoal saúde ne’e barak los, ita oresiza halo verifikasaun ba sira nia lista prezensa ka ordem servisu atu nune’e bele halo prosesu pagamentu ne’e, tanba ne’e kondisaun ida atu bele hetan pagamentu”esplika diretór ezekutivu HNGV, Alito Soares, iha Novu Turizmu, tersa (21/09/2021)

Tanba ne’e, tenke verifika didi’ak no kompleta dokumentus atu haruka ba ministériu finansas nune’e bele hetan sira nia direitu, no importante katak sira nia direitu ne’e la bele lakon.

Da-daun ne’e dadus ne’ebé tama mai iha ami nia fatin hamutuk 5000 ital, ida ne’e ita tenki verufika didiak, no aban ami sei tuur hamutuk ho diretór Munisípiu sira atu bele hare fali sira nia dadus ida-idak, atu nune’e ita la bele husik ema ruma la hetan, no ita asegura katak Munisipiu sira tenki identifika ninia ema ne’e lolos, tama iha kategoria ida ne’ebé, tanba iha ne’eba iha kategoria lubuk ida,” informa nia

Nia hatutan, kategoria hanesan, sira ne’ebé servisu iha izolamentu, no sira ne’ebé la servisu iha izolamentu, maibé iha risku atu bele kontamina husi moras, ekipa ida servisu apoiu nian, iha tan ekipa ida ba vasinasaun nian, ekipa kondutor sira, tenki koloka didiak sira nia fatin tanba osan simu la hanesan, labele kahur, se kahur mak balu simu liu balu simu menus bele hamosu problema.

Ita tenki koloka ema iha fatin ne’ebé lolos, se lae nia servisu iha izolamentu ita tau fali ba fatin seluk ne’e bele iha problema ona, tanba ne’e ita tenki servisu hamutuk ho diretór saúde Munisípiu sira, Óspital sira no diretór nasional sira para atu hare didiak sira nia ema ne’ebé envolve iha prevensaun mitigasaun Covid-19 ne’e, nune’e to pagamentu ne’e la bele prejudika fali ema ruma,” Tenik nia

Jornalista : Sandi Belo

Editór        : Agapito de Deus