LafaekNews-Governu liu husi konsellu ministru(KM) deside hakotu ona Komfinamentu obrigatóriu Jerál iha munisípiu Dili, no mantein serka sanitaria ba munisípiu haat, kompostu husi Baucau, Ermera, Dili, no Kovalima.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, hafoin halo análize ba aprezentasaun husi pontu situasaun epidemiolójika país, husi koordenadór sira Sala Situasaun Sentru Integradu Jestaun Krize (SIJK) nian, deside ona, hakotu impozisaun Konfinamentu Obrigatóriu Jerál (lockdown) ba populasaun iha Munisípiu Dili nian,
Hafoin halo análize ba aprezentasaun husi pontu situasaun epidemiolójika país, husi koordenadór sira Sala Situasaun Sentru Integradu Jestaun Krize (SIJK) nian, deside ona, hakotu impozisaun Konfinamentu Obrigatóriu Jerál (lockdown) ba populasaun iha Munisípiu Dili nian, husi tuku 23:59, husi loron 9 fulan-setembru tinan 2021, maibé mantein impozisaun serka sanitária iha Munisípiu Baucau, Ermera, Dili, no Kovalima, to’o loron 22 fulan-setembru tinan 2021, dehan Fidelis ba Jornalista hafoin remata enkontru KM iha Ministériu Finansas Aitarak Laran Dili, kuarta (08/09/21).
Governante ne’e akresenta, hahú aban loke fila-fali atividade relijioza no transporte Públiku sira bele sirkula maibé tenke mantein nafatin regra protokolu husi ministériu Saúde nian no OMS.
Fidelis hatutan, iha reuniaun konsellu ministru (KM) mós deside hakotu impozisaun serka sanitária iha ‘area sira ne’ebé abranja husi suku Naimeko, postu administrativu Pante Makassar, no husi suku Bobometo, postu administrativu Oesilu, suku rua ne’e iha Rejiaun Administrativa Espesiál Oekusi Ambenu(RAEOA) nian, to’o tuku 23:59, husi loron 8 fulan-setembru tinan 2021.
Nune’e impozisaun serka sanitária iha Munisípiu Manufahi, ne’ebé vigora to’o loron 15 fulan-setembru tinan 2021, la iha alterasaun, dehan Fidelis.
Bandu nafatin tama no sai husi munisípiu Baukau, Kovalima, Dili, Ermera no Manufahi, exetu tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian,Fidelis esplika.
Proibisaun ida-ne’e la abranje ba indivídu sira ne’ebé komprova ona vasinasaun kompleta (doze rua) kontra COVID-19 nian, nune’e mós ba labarik sira iha tinan neen mai-kraik ne’ebé akompaña indivídu, hakotu Nia.
Jornalista : Juvita Dos Santos
Asisten Editór: Egidio Nono
