Lafaek News—Ministru Prezidénsia no Konsellu Ministru (MPKM), Fidelis Manuel Leite Magalhães, liu husi komferénsia imprensa hateten, impoin komfinamentu obrigatroiu iha Dili, atu prevene variante delta maka sidadaun vasina kompletu ona hakmatek lai iha uma, tanba bele lori risku ba ema ne’ebé sedauk vasina liu-liu ba inan isin rua no labarik ki’ik.
“Mezmu vasina tiha ona maibé lori risku, maske sira la moras la boot maibé lori risku ba sira ne’ebé seidauk vasina, tanba ho variante foun ida ne’e tau iha risku seguransa labarik ki’ik nian no feto isin rua sira ne’ebé mak seidauk hetan vasina,” dehan Fidelis ba Jornalista iha Palasio Governu Dili, kinta (26/08/21).
Governante mos relata, husi númeru 52 ne’ebé mak mate ho virus SARS CoV-2 iha Timor Leste laiha ema ida simu vasina kompleta, signifika katak ema 52 ne’ebé mak lakon sira nia vida hotu-hotu seidauk simu vasina kompleta.
“Tanba ita hotu hatene katak iha óspital mós pesoál saúde sira oras ne’e barak mak moras infetadu pozitivu, i atu prevene para ke númeru moras la aumenta mak governu tenke hola medidas ne’ebé mak infelizmente tenke foti dala ida tan ba loron 7 nia laran, au mezmu tempu apela nafatin ba komunidade sira atu aumenta númeru vasinasaun, númeru vasinasaun nivél nasionál seidauk to’o objetivu ida ne’ebé mak ita hotu hakarak i ida ne’ebé mak bele lori imunidade ba ita hotu,” nia informa.
Enkuantu medida ne’ebé foti sei kontribui atu forma drástiku halo kotu lai transmisaun no fó espasu ba pesoál saúde sira bele organiza sira nia an di’ak liu, organiza sistema di’ak liu atu bele atua, tanba selae wainhira númeru aúmenta pesoál saúde sira laiha kapasidade atu fó tratamentu ba sidadaun sira, la’os de’it ba sira ne’ebé ba tan Covid-19 maibé sira ba tan moras seluk hanesan presiza fó partus no seluk tan.
Entretantu husi loron 16 to’o 22 agustu, Timor Leste rejista ona totál infesaun foun ho 1.651 ne’ebé mai husi corona virus variante foun ne’e, ema 54 biasa no ema ne’ebé mate ho covid-19 hamutuk 18.
Jornalista : Juvita dos Santos
Asisten Editór : Pedro de Almeida
