Lafaek News—Ministériu Ensinu Superior Sensia no Kultura (MESSK) Longuinhos dos Santos, afirma, hare’e ba númeiru Covid-19 iha Dili sa’e makas, tan ne’e sei hakerek karta ida ba Ministériu Saúde katak faboravel duni ou la’e atu suspende aula prezensiál, ne’e hein de’it rekomendasaun husi MS.
“Ita hein depois ha’u sei hakerek karta ida ba iha ministra saúde para atu husu rekomendasaun, ita mós husu ona ba konsellu ministru, maibé deklara katak sei hein hela rekomendasaun husi ministéru saúde, maibé seidauk iha resposta ida konaba ba atu suspende ka lae,” dehan MESSK, Longuinhos dos Santos, ba jornalista sira iha palasio governu hafoin remata reuniaun KM, kuarta (18/08/2021).
MESSK hatutan, sedauk hetan rekomendasaun husi Ministériu Saúde, tanba ne’e Ministériu Ensinu Superior Sensia no Kultura mós seidauk halo suspende ba aula prezensiál, atu suspende atividade ensinu superior maka sei hein instrusaun.
Governante hateten, durante ne’e aktividade ensinu superior la’o hela, tanba Ministériu Ensinu Superior Sensia no Kultura fó hela lisensa ba ensinu superior sira atu halo aula prezensiál, maibé tenke kumpri rekijitus lubuk ida husi Ministériu Saúde nian.
“Primeru máka tenki asegura kondisaun, segundu tenki tuir protokolu ministériu saúde nian no mós organisasaun mundial saúde nian, mak uza masker no distansiamentu sosiál, fase liman lor-loron no tenke vasina, ne’e importante tebes ba estudante sira,” tenik Longuinhos.
Enkuantu Longuinhos imforma, iha rekesitus ida mak estudante sira tenki presisa hatudu kartaun vasina uainhira atu tama ba aulas prezensiál nian, kuandu estudante balun mak kartaun vasina la iha tenki tuir aula online iha uma.
Jornalista : Etelvina Sarmento
Asisten Editór : Pedro de Almeida
