Lafaek News–Mate isin Noviana da Costa, tenke tarde lori ba nia rezidénsia tanba Kareta funeráriu husi MSSI la sufisiente atu lori kedan ba Lautém, hein too karreta funeráriu fila husi munisípiu foin transporta hori kalan tuku 10 ba suku Home postu administrativu Lautém, munisípiu Lautem.
Domingos Alves, hanesan aman haki’ak husi matebian Noviana da Costa, hateten, ohin transporta mate isin mai husi Ataúru prosesa tuir sosiál hodi tula ho ro Unidade Polisía Fronteira (UPF), to’o mai iha Dili, tuir mai kareta funeráriu husi MSSI mak responsabiliza transporta mate isin ba Lospalos, maibé tanba kareta funeráriu aat, entaun hein kareta seluk atu tula ba Lospalos, maibé too agora kareta ida mós seidauk funeráriu ida la mosu.
‘“Ohin ami to’o husi Ataúru mai kareta funeráriu atu tula mate isin ne’e ba liu Lospalos, maibé kareta ne’ebé atu tula mate isin ba liu Lospalos kondisaun la di’ak no hein kareta seluk fila husi munisípiu mak foin tula mate isin Noviana ba fali Lospalos ,” dehan familia matebian, Domingos Alves, iha mortuariu HNGV, Bidau Dili, 04/08/2021.
Família husi matebian ne’e informa, Noviana da Costa, idade tinan sia (9) husi munisípiu Lautem hela ho nia família (papa boot) iha Ataúru hodi eskola, maibé matebian sofre moras to’o hakotu iis iha loron tersa-feira horseik oras tuku 15:30 iha aldeia aldeia Ilitikaraquia, Suku Maumeta, munisípiu Dili.
Ikus mai família matebian deside lori ba haloot iha Lospalos tuir kultura Lautem nian, tuir observasaun Lafaek News nota iha HNGV, mate isin Noviana ne’ebé transporta husi Ataúru atu lori ba haloot iha Lospalos, maibé kareta funeráriu laiha kontinua latan provizóriu durante loron ida ho kalan iha mortuáriu.
hatan ba kestaun ne’e, Ministériu Solidariede Sosiál no Inkluzaun (MSSI) liu husi Diresaun Nasionál Asisténsia Sosiál (DNAS), Lucas Tois, informa, karreta ambulánsia iha loron tersa ne’e sai hotu ba munisípiu, tanba ne’e matebian sei iha mortuáriu, maibé ambulánsia fila ona maka sei transposta matebian ba nia rezidénsia iha munisípiu Lautem..
“Ami akompañia hela matebian ne’ebé mate iha Atauro tula ho ro too iha Dili ohin dadersan, como ambulánsia laiha entaun ambulánsia VIP maka ba tula tau iha mortuáriu hodi hein ambulánsia sira fila mai Dili maka atende fila-fali matebian ne’e hodi lori ba Lospalos,” dehan Diretor Nasionál Asisténsia Sosiál (DNAS), Lucas Tois, ba lafaek news liu husi via telefone, kuarta (04/08/2021).
Diretor esplika, ohin meudia maka ambulansia iha hotu Dili, transporta kedas matebian ba nia hela fatin lospalos, maibe ambulansia 4 ne’ebe kondisaun diak sai hotu ba munisipiu tanba ne’e agora hein de’it.
Nia relata, total karreta funeráriu iha MSSI hamutuk 10 rua atende ba covid-19, no 8 maka atende ba óbitu, maibe 4 da-daun iha hela ofisina no 4 maka movimentu.
Jornalista : Egidio Nono
Editór : Agapito de Deus
