Lafaek News- Konsellu Ministrus kuarta, (04/08) aprova ona projetu rezolusaun governu nian kona-ba atualizasaun resensiamentu eleitorál iha estranjeiru no aprovasaun kalendáriu kona-ba operasaun resensiamentu eleitorál iha estranjeiru ba eleisaun Prezidente Repúblika ne’ebé sei hala’o iha tinan 2022.
Ministru Prezidénsia no Konsellu Ministru, Fidelis Manuel Leite Magalhães hateten, rezolusaun governu ne’e ho objetivu atu asegura realizasaun operasaun resenseamentu eleitorál iha estranjeiru, hodi permite sidadaun timór sira ne’ebé hela iha estranjeiru, hodi fó sira nia direitu ba votu.
“Atividade sira inskrisaun nian no atualizasaun inskrisaun iha resensiamentu eleitorál sei hala’o iha loron 3 fulan setembru tinan 2021 to’o loron 14 fulan-janeiru tinan 2022, ne’ebé sei sai períodu ida ne’ebé naruk tebes la hanesan baibain tanba pandemia COVID-19” dehan MPKM Fidelis Magalhães hafoin remata enkontru KM iha Palasiu Governu Dili, kuarta (04/08/21).
Aleinde misaun diplomátika no postu konsulár sira, atividade hirak ne’e sei mós hala’o iha postu resensiamentu movel sira iha Austrália, iha Koreia Sul, iha Portugál no iha Reinu Unidu.
Jornalista : Juvita dos Santos
Editór : Agapito de Deus
