Lafaek News—Vítima inséndiu Merkadu Komoro, Joana Moreira dos Santos nu’udar estudante lakon nia dokumentus no farda eskola to’o la tuir aprendisajen tanba impaktu husi insendiu ne’ebé akontese iha eis merkadu Komoro loron kinta (29/07) foin lalais ne’e.
Dadaun ne’e Joana Morreira dos Santos hala’o nia estudu iha eskola sekundáriu jerál 10 de Dezembro Komoro, terseiru anu, maibé insendiu ne’e mosu iha (29/07), nunka salva dokumentus no farda eskola tan ne’e la tuir prosesu aprendisajen hanesan bain-bain.
“Ha’u nia farda no dokumentus ahi han motuk hotu kedas nunka ida hela, agora ha’u nia maluk estudante sira ba eskola, ha’u labele ba tuir aprendisajen hanesan bain-bain, tanba farda no dokumentus sira ahi han hotu,” dehan vitima insendiu Joana Moreira dos Santos ba jornalista lafaek news iha fatin evakuasaun komoro, segunda (02/08/2021).
Joana ho sentimentu tristeza haktuir, triste tebes tanba dadaun ne’e besik atu remata ona estudu iha eskola sekundaria, maibé dokumentus no farda eskola inklui materia aprendisajen ahi han mo’os, ho preokupasaun ne’e sei hasoru dereta direktor da eskola 10 de dezembro atu koalia konaba farda, nune’e tuir fali aula.
“Ha’u senti triste liu tanba tinan ida ne’e ha’u atu remata ona ha’u nia estudu iha sekundariu mak ahi han hotu dokumentus no farda sira, ha’u atu hasoru direktór kona-ba farda eskola nian,”nia hakotu
Entretantu Diretur Eskola sekundaria Geral 10 de dezembro Komoro, Domingos Savio, hatete, estudante ne’ebé lakon dokumentus no farda eskola, nain 10 maka informa ona, no eskola sei fasilita liliu farda eskola atu bele tuir aprendisajen.
“Ohin estudante nain sanulu mak mai hatoo sira nia problema kona-ba inséndiu iha eis merkadu Komoro ahi han hotu sira nia dokumentus no farda eskola nia, eskola labele responde sira nia problema, tanba eskola gratuita, maibé ami fasilita sira bele sosa faru mutin kalsa no saia abu bele uja, tinan oin mak ami bele hare’e fila fali sira nia kaos eskola nian ,” dehan Diretór Domingos Savio.
Jornalista : Domingas Viana
Editór : Pedro de Almeida
