Lafek News—Diretor Ezekutivu Asosiasaun Halibur Defisiénsia Matan Timor Leste (AHDMTL) Gaspar Afonso, hato’o ba Presidente Republika (PR) Francisco Guterres Lú Olo, tanba konsidera Ministériu Saúde halo atendementu ba ema ho defisiénsia la efetivu iha ambitu Covid-19.
Tuir nia, iha situasaun Covid-19 nia laran ministériu saúde atendementu ba ema ho defisiénsia la efetivu, tanba defisiénsia balun positivu auto-izolamentu iha uma, maibé laiha kontrolu, lolos presiza iha kontrolu ne’ebé masimu, hodi labele iha tendensia diskriminativu.
“Ami ko’alia liu ba antedementu ministériu saúde nian ba ema ho defisiénsia, tanba ami nia ema na’in ualu positivu, maibé ministéiru saúde la tau prioridade, tan ne’e maka ami hakarak hato’o ba PR, atu bele fó hanoin ba governu oinsa mak atendementu bele adekuadu,” dehan Diretor Ezekutivu (AHDMTL, Gaspar Afonso ba Jornalista hafoin hasoru malu ho PR iha Palasio presidensial Nicolau, sesta (30/07/2021).
Nia fundamenta, durante ne’e maluk defisiénsia ne’ebé maka positivu Covid-19 halo auto-izolamentu iha uma de’it, entaun atu di’ak ou la’e ne’e, parte saúde nunka halo atendementu no kontrola.
Entretantu, total defisiénsia Timor Leste hamutuk rihun 38.118, no hirak ne’ebé simu ona vasina hamutuk atus ida (100) no sira ne’ebé maka sedauk simu vasina obrigatóriu tenke obedese atu bele kuida saúde públika.
Jornalista : Rita Moniz
Asisten Editór : Pedro de Almeida
