Lafaek News-Konsellu Ministru ohin sesta, (30/07) hala’o enkontru hodi impoin konfinamentu obrigatóriu (KO) iha Postu Ermera no Postu Railaku Munisípiu Ermera, tanba numeiru kazu infetadu sa’e makaas.
Ministru Prezidénsia no Konsellu Ministru, Fidelis Manuel Leite Magalhães hateten, hafoin rona informasaun husi Sentru Integradu Jestaun Krije (SIJK) katak númeru ema infetadu sa’e lalais, agora númeru infetadu iha Ermera sa’e ona ba atus tolu, entaun ida ne’e preokupasaun bo’ot ida ba SIJK no sira husu konsellu ministru hola desizaun sériu ruma hodi ajuda atu virus labele da’et makaas tan iha munisipiu Ermera.
“Ho ida ne’e iha postu rua ne’e Ermera no Railaku sei iha konfinamentu obrigatóriu, no konfinamentu ne’e sei tama em vigór ohin to’o oras loron 11 fulan agusto 2021, oras 11:59 kalan,” dehan Ministru Fidelis Magalhães ba Jornalista hafoin remata enkontru KM iha Palasio Governu Dili, sesta (30/07/21).
Governante ne’e akresenta, konsellu ministru mós halo orientasaun ida delibera ba ministériu Saúde no ajénsia sira hotu ne’ebé mak servisu iha programa vasinasaun nian atu intensifika movimentu rekursu sira tomak iha munisípiu Ermera atu nune’e númeru populasaun ne’ebé simu vasina sa’e ba bebeik, tanba até a data númeru ne’ebé simu vasinasa doze dahuluk ne’e pursentu 12 de’it, neduni maioria populasaun iha Ermera seidauk simu vasina.
“Tanba ne’e governu husu ministeriu saúde no instituisaun hotu atu reforsa esforsu vasinasaun iha Ermera nomos apela dala ida tan ba ita nia inan aman sira, familia sira no maun alin sira atu bele hakbesik an ba sentru saúde sira hodi simu vasina,” informa Fidelis.
Entretantu iha Postu Ermera no Postu Railaku Munis’ipiu Ermera sei suspende atividade edukativa, atividade relijioza no atividade sira seluk ne’ebé halibur ema barak.
Jornalista : Juvita dos Santos
Asisten Editór : Pedro de Almeida
