Lafaek News— Governu liu hosi Ministériu Ensinu Superiór Siénsia no Kultura apoiu subsídiu $.150 kada estudante universitáriu ne’e la loos, diploma ministerial nú, 34/2021, 19 fulan Maiu esplika apoiu subsídiu ne’e ba to’o limite másimu $.150.
Atu klarifika klean, Diretóra Jerál Ensinu Superior Siénsia no Kultura, Maria Filomena Lay Guterres esplika, programa izensaun pagamentu propinas ba estudante ensinu superiór nasionál hanesan medida apoiu, nune’e mós sai polítika ida Ministériu Ensinu Superior nian atu apoiu, maibé programa ne’e regula hosi diploma ministeriál No 34/2021, iha loron 19 fulan Maiu.
“Iha diploma ne’e koloka ona medida ba apoiu nian ne’ebé hatudu iha kapítilu daruak (2), artgu daruak hatete, estudante aitvu sira anuletivu 2021, iha kursu titular ne’ebé ho lisensa iha instituisaun públiku no privadu sira sei benefisia izensaun pagamentu propinas ho efeitu retroativu iha semestre dahuluk 2021 nian, to’o limite masimu $ 150 dollares ba kada estudante,” esplika Maria Filomena Lay Guterres, iha nia kna’ar fatin kolmera, Tersa (27/07/2021).
Iha diploma ministerial iha artigu daruak iha pontu tolu (3) hatete, montante propinas ne’ebé devolve estudante karik la to’o montante ne’ebé temi iha pontu 1, estabelesimentu ensinu superior responsavél tenke transfere de’it montante propinas estudante selu, laiha direitu ba kualker valor ne’ebé liu.
“Tanba se esdutante ne’e nia propinas $ 120, governu reinbolsa $120. Universidade Nasional Timor Lorosa’e (UNTL) selu de’it $30, governu reinbolsa $30, maibé estudante sira ne’ebé selu liu $150, governu so bele selu de’it $150,” hakotu nia
Iha sorin seluk, Reitór Universidade da Paz, Adolmando Soare Amaral hatete, polítika VIII governu nian liu hosi Ministériu Ensinu Superiór Siénsia no Kultura (MESSK), iha orsamentu ratifikativu hakarak atu apoiu subsídiu propinas estudante sira.
Iha deklarasaun Ministru nian katak subsídiu propinas ne’e to’o iha 150 dolares maibé iha transferensia ne’ebé ministeriu finansas ka fundu covid-19 halo ne’e bazeia ba propinas ne’ebé mak durante ne’e aplika iha kada universidade.
“Iha universidade da Paz iha variedade ba propinas hahu hosi 100 ate 140 dolares. Bainhira propinas ne’e liuhosi $150 governu so bele apoiu $150 maibé karik propinas ne’e menus hosi $150 entaun governu apoiu tuir ida ne’e,” dehan Adolmando
Nia hatutan, UNPAZ propinas hahú hosi $140 tun mai $100 no ida ne’e governu halo transferénsia bazeia ba propinas ne’ebé durante ne’e aplika iha universidade, maibé iha universidade balun nia propinas liu $.150 entaun governu so bele fó apoiu ba $.150, maibé UNPAZ nia propinas hahú hosi $.140 mai kraik universidade asesu de’it fundus iha $.150 nia okos.
Jornalista : Felisberto Fernandes
Editór : Agapito de Deus
