Lafaek News–Desizaun Konsellu Ministru deside Ministeriu Edukasaun Juventude no Desportu (MEJD) Armindo Maia deside reativa eskola iha município Baukau no Dili, maibe estudantes sira sei iha hela munisipiu ida-idak labele mai eskola tanba serka sanitaria.
“Ami nia kolega estudante sira barak mak seidauk mai tuir aula tanba barak sei iha foho ho nune’e sira labele mai tuir aula” Haktuir estudante Maria da Cruz, Ba Lafaek News, (21/07/2021), Iha resinto eskola sekundaria Jeral 10 de Dezembro Komoro.
Entretantu estudante ne’e mos sujere ba governu atu bele loke hikas dalan publiku sira hodi nune’e transporte publiku sira bele sirkula normal mai kapital atu transporta estudante ne’ebe sei iha munisipiu mai Dili hodi asesu ba prosesu aprendizajen.
“Ha’u sujere ba ita nia governante sira atu bele autoriza ona transporte publiku sira hanesan (Bus) bele halao ona movimentu atu ami nia maluk estudante sira ne’ebe sei iha foho bele mai Dili hodi tuir prosesu aprendisajen hanesan bai-bain”
Iha fatin hanesan Diretor da eskola Secundaria Jeral10 de Dezembru, Jose Maria da Costa, akresenta estudante barak mak la partisipa aula tanba sei iha munisipiu.
“Ami nia estudante barak mak sei iha munisipiu tanba ita nia governu aplika hela serka sanitaria no konfinamentu domisiliariu iha fulan kotuk liu ba tan ne’e estudante ne’ebe tuir aula normal sei minimu tebes, maibe ita espera governu bele hare’e mos asunto ida ne’e hodi normaliza hikas transporte publiku sira bele sirkula fali atu estudante ne’ebe iha foho bele mai Dili hodi tuir aula,” dehan, Diretor eskola 10 de Dezembru ne’e sujere.
Jornalista : Anselmo Monteiro
Editor : Agapito de Deus
