Lafaek News—Koordenadór Forsas Tarefas Ba Prevensaun no Mitigasaun Surtu Covid-19, Rui Maria de Araújo, informa, pasiente Covid-19 mane ida hakotu iis iha sala Izolamentu Vera Kruz no kazu foun ohin hamutuk 52.
“Óbitu ne’ebé relata iha loron 16 de Jullu 2021: 1 (ida), ho detallu mane 1, ho idade 56, Timor-oan, hela iha Becora, Dili, diagnostikadu ho Covid-19 (Cycle Threshold: N2 gene 34,4, E gene 33,7) iha HNGV iha loron 29 Juñu 2021,” dehan Kordenadór iha komunikadu imprensa ne’ebé lafaeknews asesu, Sesta (16/07/2021).
Koordenadór konta, metebian hetan asidente vascular cerebral (avc) hemorrágico (stroke haemorrhagic), no iha mós istória hipertensão (la halo tratamentu durante liu fulan 3), iha loron ne’e kedas transfere ba hala’o tratamentu iha vera kruz tuir protokolu tratamentu AVC, no protokolu tratamentu Covid-19, hafoin loron 18, pasiente la mellora ona.
“Ohin dader tuku 08h50 i’is-kotu tan bá pressão intrakranial ne’ebé a’as, provoka multiple organ failure. Cycle Threshold post mortem (hafoin i’is-kotu): N2 gene 33,8; E gene 31, no familia kordena ho ekipa saúde atu hala’o funeral tuir protokolu ne’ebé adopta iha Timor-Leste,” tuir nia.
Enkuantu kordenador relata kazu detetatu foun iha dia 16 de Jullu de 2021: 52 (iha Dili 30, munisípiu seluk hamutuk 22), kazu detetadu foun ohin: mane 28, feto 24, no husi total kazu detetadu foun hirak ne’e ho idade 12:1, ho idade entre 12-59 nain 47 (90,3%), ho idade 60:4, no kazu detetadu foun ohin, 7,7% maka sintomátiku (hatudu sintomas).
Nia dehan, kazu rekuperadu ne’ebé ralata ohin, hamutuk: 131,no kazu ativu : 810, total kazu konfirmadu kumulativu iha 16 de Jullu 2021 (sura husi 21 Marsu 2020): 10.04.
Entertantu, iha izolamentu Vera Cruz halo tratamentu ba kazu detetadu nain 17, iha área obstetrisia nain 4, iha medisina interna nain 10, iha sirurjia nain 3.
“Nain 4 iha obstetrisia, kategoria leve (mild) hotu, no husi sira nain 10 iha medisina interna, 3 grave (1 ho ventilador, 2 uza oksijéniu), nain 1 moderadu, nain 6 leve (mild), sira nain 3 iha sirurjia, kategoria leve (mild) hotu,” hateten kordenador.
Jornalista : Sandi Belo
Asisten Editór : Pedro de Almeida
