Lafaek News--Governu liu husi Konsellu Ministru aprova fixa tetu agregadu ho montante billiaun US$1.571,6 ho prioridade nasionál neen ba Orsamentu Jerál Estadu (OJE) tinan 2022.
Ministru Prezidénsia Konsellu Ministrus, Fidelis Manuel Leite Magalhães hateten, husi prioridade ne’ebé define hanesan, dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu sira hanesan, agrikultura no turizmu, ambiente no konetividade, dezenvolvimentu setór privadu, dezenvolvimentu rurál no boa governasaun, orsamentu Jerál Estadu tinan 2022, ne’ebé aprezenta husi Vise-Ministra Finansas, Sara Lobo Brites.
“Konsellu Ministrus aprova mós konjuntu inisiativa adisionál ne’ebé fixa tetu agregadu ho montante millaun 1.571,6. Governu define ona prioridade nasionál neen ba OJE tinan 2022”, dehan MPKM Fidelis Magalhães hafoin remata enkontru KM iha Palásiu Governu Dili, kuarta, (14/07/21).
Alende ne’e Vise Ministra Finasas, Sara Brite halo mós aprezentasaun ida ba kona-ba sorumutuk ho parseiru dezenvolvimentu sira tinan 2021 Timor-Leste & Development Partners Meeting, (TLDPM) ne’ebé sei hala’o iha auditóriu Kay Rala Xanana Gusmão, iha loron 30 fulan-jullu,tanba TLDPM hahú uluk ho sorumutuk bilaterál iha loron 27 fulan-jullu, liu husi sorumutu ida kona-ba integrasaun ekonómika rejionál iha loron 28 fulan-jullu no fórum ida Organizasaun Mundiál Komérsiu iha loron 29 fulan-jullu.
“Sorumutuk ida ne’e ho parseiru dezenvolvimentu sira organiza tina-tinan husi governu hodi fahe nia vizaun ba oin analiza prioridade ba médiu prazu no hodi haree ba progresu ne’ebé alkansa tiha ona iha dezenvolvimentu nasionál” hakou Nia.
Jornalista : Juvita dos Santos
Editór : Agapito de Deus
