Lafaek News–Luciana Soares de Fátima husi komunidade aldeia Lemorana Suku Dare, postu Vera-Kruz, munisípiu Dili, husu governu ajuda netik besi hodi harii nia uma ne’ebe lalubur (inundasaun) lalin moos ba tasi iha loron 4 Abril.
Inan faluk ne’e kontente tanba ho viziñu sira tanba ajuda fatin hodi hela provizóriu no agradese mós ba parókia Balide bele ajuda kalen uma nian 60, maibé seidauk harii uma tanba material seidauk kompleta.
“Agora ha’u hela ho Tiu ida nia uma, sente di’ak uitoan tanba bele fò fatin mai hela, problema ida mak uma kain haat mak hela hamutuk,’’ Luciana Ba Lafaek news, iha Lemorana, foin lalais.
kalen 60 iha hetan husi igreja Balide, husi Governu nian seidauk, presiza liu ai ho besi no semente, tanbà faluk ne’e iha de’it oan mane ida, maibé la servisu, moris iha presaun terus ho susar laran.
Liga ho inan faluk ne’e, Xefe Aldeia Lemorana rekoñese iha familia afetadu balu mak hela hamutuk viziñu.
“Ami ezije liu ba Governu haree material konstrusaun balu mai ajuda ba ami nia komunidade afetadu, tanbà sira durante ne’e kaka hela hamutuk de’it la hela ketak, balu fasilita hela sede Aldeia ba sira, iha familia ida ho nia oan, haat (4) hela hamutuk iha familia ida nia uma, iha keluarga ida hela iha ha’u nia uma rasik no iha mak ba hela tiha iha uma koz,’’ xefe aldeia afirma.
Tuir autoridade lokal ne’e komunidade ne’ebè afetadu dezastre natuarais iha loron 04/04/2021 liubá, iha aldeia Lemorana hamutuk uma kain (11), no ida ne’ebè hetan Ameasa uma kain (63), too oras ne’e seidauk rekupera sira nia hela fatin.
Observasaun Lafaek news nota komunidade afetadu uma kain (11) hetan ona material Konstrusaun balu hanesan kalen semente husi parte igreja no AADPP-UNTL, maibè husi material konstrusaun hirak ne’e presiza kompleta tan material balu ba vítima sira bele konstrui hikas uma ne’ebé mota sobu iha udan boot liu ba.
Jornalista : João da Costa Soares
Editòr : Agapito de Deus
