Lafaek News-Ohin, 07/07/2021, tuku 12:00 kalan hamosu kazu omesidu ne’ebé mak suspeitu ho naran inisial ADS oho mate nia fen hanesan Membru Polísia Nasionál Timor Leste (PNTL) ho deviza primeiru sarjentu iha aldeia, Anin Fuik, Suku Madohi, Postu Administrativu Dom Aleixo, Munisípiu Dili.
Tuir kronolojia ne’ebé mak Lafaek News asesu iha Membru PNTL, ne’ebé mak iha fatin akontesementu katak, suspeitu mai iha Beto Barat kuaze loron ona hodi tenta buka hela de’it problema ho nia fen Rosantina dos Santos.
“Iha tuku 9:00 kalan ne’e, suspeitu tenta buka problema ho nia fen nu’udar membru PNTL, no oras mos ba dadauk ona, entaun suspeitu kontinua hein iha odamatan hodi husu iskeru, maibé ba tuku 12:00 kalan boot ona mak suspeitu ADS sona ba vitima nia kabun ho rezulta mate fatin,” informa Xefe Gabinete Jenero PNTL, Superitendente Julia da Gama ba Lafaek News liuhosi via telefone, Kuarta (07/07/2021)
Antes Suspeitu ADS oho nia fen kaben Rosantina, sira na’in haksesuk malu ona, nune’e suspeitu dere odamatan husu iskeru dala rua mak hamosu kazu omesidu hodi rezulta nia fen maten fatin, no husik hela nia oan mane ho naran Juvino dos Santos Sosare foin mak tinan 16.
Suspeitu ADS,Husi Munisípiu Baucau, Postu Administrativu Venilale, Suku Watuhaku Aldeia Vatuhasa.
Antes ne’e mós suspeitu ADS involve mós kazu iha tinan kotuk ne’ebé mak hamutuk grupu balun hodi sunu pertamina iha parte Comoro, no foin mak sai hosi Prizaun iha tinan ne’e, maibé durante ne’e hela de’it ho nia família sira.
Nune’e, suspeitu foin mak ba iha nia ferik oan nia uma kuaze loron rua ona mak nia tenta hodi oho nia ferik hanesan membru Polísia Nasionál Timor Leste (PNTL) ne’ebé mak hala’o hela kna’ar iha Squarda PNTL Dom Aleixo.
Nune’e, Diretór Guarda Prizional Timor-Leste, João Domingos, los duni suspeitu ADS foin mak sai hosi prizaun tanba komete crime Incendo e Dano agravado nuk. 0184/19.DICMR.
Data entrada 07/04/2019 no liberdade iha 23/01/2020. ( liberdade husi tribunal dili sei ho status prisão preventiva).
Ho kazu omesidu ne’e, Lafaek News tenta konfirma ho Xefe Suku Madohi, Postu Administrativu Dom Aleixo, Munisípiu Dili, Bernadino de Cristo Ferreira “Teke Timor”, hateten, nia seidauk iha informasaun kona-ba kazu omesidu ne’e, tanba Xefe Aldeia seidauk pasa informasaun ida.
Nune’e, Polísia Nasionál Investigasaun Kriminal kontinua buka hela suspeitu ne’ebé oho nia fen, Suspeitu ADS to’o agora PNTL seidauk kaptura tanba suspeitu sei subar a’an hela.
Mate isin membru PNTL ne’ebé mak hetan sona hosi nia laen rasik agora dadauk halo hela autopsia iha Hospital Nasionál Guidu Valadares (HNGV) hodi bele hatene nia motivu lolos ba kazu omesidu ne’e.
Jornalista : Acacio Pinto
Editór : Floriano Soares
