Lafaek News—Segundu Komandante Polísia Nasionál Timor-Leste (PNTL), munisípiu Dili Superintendente Polísia, João Sancho Pires, informa Komandandu munisípiu Dili halo sensibilizasaun ba membru PNTL sira ne’ebé seidauk simu vasina.
“Komandante munisípiu Dili kordena ho saúde munisípiu Dili no saúde PNTL halo sensibilizasaun hodi esplika lalaok vasina nian ba membru PNTL ne’ebé seidauk simu Vasina astrazeneka no Sinovax,” João Sancho Pires ba jornalista KMD Kaikoli Dili, Segunda 05/07/2021.
Adjuntu Komandante munisípiu Dili ne’e esplika, membru ne’ebé moras hela hanesan tensaun sa’e makas, ka moras seluk sei hatoo uluk ba doutor sira, karik doutor sira dehan labele entaun hein fali kondisaun di’ak hafoin simu vasina.
“Membru PNTL ne’ebé seidauk simu vasina presiza rona lai esplikasaun husi doutor sira, nune’e bele involve iha sira nia aan ba vasina tanba membru sira maka hamrik firme iha lina frente,” Sancho afirma.
Nia afirma, asina ne’e la’os obrigatóriu, maibé sira halo sensibilizasaun nune’e membru sira ne’ebé seidauk simu vasina ne’e bele hakbesik aan ba ba sentru saúde sira hodi simu vasina ne’e rasik.
Nia sujere, hakarak ka lakohi tenki asegura uluk sira nia aan tanba ne’e KMD bolu doutor sira mai esplika ba membru PNTL bele hatene nune’e sira bele tuir vasina.
“Ita la obriga sira, maibé ita sensibiliza sira bele tuir vasina katak saúde ne’e iha ita nia liman rasik, tan ne’e tenki tuir vasina nune’e ita nia imunidade forte hodi tahan virus Covid-19 ne’ebé la’o hela,” .
Entretantu membru PNTL iha munisípiu Dili barak simu ona vasina astrazeneka no sinovax, maibé hela de’it membru balu seidauk simu vasina, tan ne’e KMD servisu hamutuk ho Saúde munisípiu Dili no Saúde PNTL halo Sensibilizasaun ba membru polísia sira.
Jornalista : Orlando Magno
Editór : Agapito de Deus
