Lafaek News—Institutu Nasionál Ciénsia no Teknolojia (INCT), loke formasaun ba dosentes nain tolu nulu eleva kuiñesimentu no abilidade professional kona-ba hakerek proposta peskiza no investigadores ho kualidade.
Prezidente Konsellu Ezekutivu INCT, José Cornelio Guterres, hatete, formasaun kontinua tinan 2020 nian ne’ebé foka liu ba hakerek proposta ba profesor sira, formandu husi Universidade 18 kada dosentes nain 2 no total husi dosente hamutuk 30.
“Ita hamosu formasaun ida ne’e tanba iha esperensia Timor oan dosente barak mak submete proposta ne’e ladun kualidade, tan ida ne’e mak kria formasaun atu fó abilidade oinsa bele halo mudansa ne’eb’e di’ak,” dehan Prezidente Konsellu Ezekutivu INCT, Jose Cornelio Guterres, ba jornalista sira iha salaun INFORDEPE Matadoru, segunda, (5/07/2021).
Iha fatin hanesan, formador João Cansio Freitas, hatutan, oportunidade ida ne’e atu loke kuinesimentu profesores Universidade sira hodi habarak liu tan peskizador iha Timor-Leste atu bele hakerek proposta peskiza sientifiku, nune’e sai benefisiu ba dezenvolvimentu rai laran.
“Ha’u mai atu fahe esperensia ba profesores universidade sira atu hakerek proposta peskiza oinsa mak bele fó oportunidade barak, para bele aprezenta proposta peskiza ba governu no INCT hodi bele habarak liu tan peskiza iha ita nia rain no sai rezultadu ne’ebé lori benefisiu dezenvolvimentu ba ita nia rain,” dehan João Cansio.
Nia salienta, universidade hotu-hotu iha atividade anuais ne’ebé relasaun ho formasaun ba profesor sira, maibé profesor sira ne’e dotoramentu ituan de’it no barak mak mestradu.
“Tanba ne’e ita tenki fó formasaun nafatin ba sira para sira bele halo peskiza no tulun sira atu bele preparadu sira nia proposta ba doutoramentu,” João Hakotu.
Jornalista : Sonia de Almeida
Asisten Editór : Pedro de Almeida
