Lafaek News—Konselleru Másimu Partidu Kmanek Haburas Unidade Nasionál Timor-Oan (KHUNTO), José dos Santos Naimori Buckar, reafirma iha loron 14 fulan Agusto 2021, sei realiza serimonia kultura (juramentu) iha foho Ramelau tuir promesa iha kampañia eleitoral.
Konselleru másimu partidu KHUNTO hatoo asuntu ne’e iha tuku 7-12 lokraik (OTL) iha serimonia preparasaun ba inaugurasaun sede nasionál partidu KHUNTO, sábadu (03/06/2021), iha aldeia Laulora suku Manleuana, postu administrativu Don Aleixo, munisípiu Dili.
“Iha lokraik ida ne’e ha’u atu fo hatene iha data 14 fulan Agustu 2021, ita tenke ba hotu Ramelau hodi halo tuir serimonia kultural iha ita nia lisan sira ne’ebé husi postu Hatu-buliku nian,” afirma Naimori.
Hodi dehan, KHUNTO tenke realiza duni juramentu Ramelau, tanba promete ona iha kampañia eleitoral iha tempu liubá, loron ne’ebé atu realiza serimonia kultural ne’e mak iha fulan Agusto tinan ne’e.
Iha eventu preparasaun ba inaugurasaun sede nasionál partidu KHUNTO ne’e, lider másimu partidu ne’e rasik husu atu militante sira mantein disiplina liu-liu seguransa sira tenke hala’o kn’ar ho didi’ak atu garante eventu ne’e la ho hakmatek no trankuilidade.
“Kalan ida ne’e atu fó hatene de’it ba kolega sira hotu liu-liu seguransa sira, iha ne’e mós ita nia polísia nasionál sei asegura iha ita nia loron serominia inaugurasaun nian,” katak lider partidu KHUNTO ne’e.
Ikus liu konselleru másimu ne’e husu nafatin seguransa sira atu tau an hanesan sidadaun ne’ebé di’ak atu partisipa iha ambiente estabilidade, paz no dame hodi kontribui oinsá bele lori nasaun ne’e ba oin.
Eventu ne’e, sei bandu ema ne’ebé hemu tua lanu, la uza maskara no lori sasan ne’ebé la merese bainhira atu partisipa iha eventu inaugurasaun sede nasionál partidu KHUNTO ne’e, ema hotu tenke mantein disiplina no tenke uza maskara hafoin bele partisipa.
Jornalista : Agapito de Deus
Editor : Acacio Pinto
