Lafaek News—Konsellu Ministru (KM) orienta ona Ministériu Saúde atu prodúz fali kartaun vasina kinur ho kualidade di’ak liu no seguru.
Ministru Prezidénsia Konsellu Ministru (MPKM), Fidelis Manuel Leite Magalhães hateten, Konsellu Ministru orienta ona Ministériu Saúde atu produz kartaun vasinasaun ho kualidade no seguru tanba, tuir informasaun ne’ebé konsellu ministru hetan katak, iha sidadaun balun ne’ebé seidauk simu vasina, tenta falsifika uza ema seluk ne’ebé simu ona imunizasaun nia kartaun hodi halo movimentu.
“Konsellu Ministru mós deside katak, husu atu ministériu saúde prodús kartaun ida-ne’ebé mak di’ak ho kualidade no seguru ba komprovativu vasina nian, tanba kartaun kinur ne’e konsellu ministru simu informasaun katak, iha atentadu atu falsifika kartaun ne’e, kartaun ne’e iha indivídu balun mak pasa fali ba familia sira seluk ne’ebé seidauk vasina,” dehan MPKM Fidélis Magalhães hafoin remata enkontru KM iha Palasio Governu Dili, Kinta (01/07/21).
Enkuantu Konsellu ministru mós husu Ministra Saúde, Odete Maria Freitas Belo, atu aselera lalais prosesu produsaun ba kartaun vasina foun ho mekanízmu eletróniku, nune’e identifika ema ne’ebé tenta atu bosok.
Jornalista : Juvita dos Santos
Editór : Agapito de Deus
