Lafaek News— Primeiru Ministru, Taur Matan Ruak, orienta ona Ministra Saúde Odete Maria Freitas Belo, hodi buka kle’an motivu matebian Hilaria de Jesus ne’ebé hakotu nia iis hafoin simu Vasina AstraZeneca iha loron kuarta (30/06/2021),iha Aldeia Olo-Olo, Suku Lour Postu Bobonaru ,Munisípiu Bobonaru.
Ministru Prezidénsia Konsellu Ministru, Fidelis Manuel Leite Magalhães hateten, Konsellu Ministru mós rona ona detalla desde tuku hira mak matebian Hilária ba fatin Vasina no bainhira mak la’o fila ba uma, no saida mak kauza, matebian hodi dezmaia no kondisaun saida mak iha antes.
“Señor Primeiru Ministru fó ona orientasaun ba Ministra saúde no ekipa Interministeriál vasina nian tenke buka to’o kle’an motivu lolos ba señora ne’e, ba señora ne’e lakon vida mak saida?. Tenke hatene to’o kle’an”, dehan MPKM Fidélis Magalhães iha Palásiu Governu Dili, kinta (01/07/21).
Governante ne’e akresenta, Primeiru Ministru mós orienta Ministra Saúde sei rekolla hodi esplika ba públiku razaun matebian Hilária hakotu nia vida. Husu mós ba ekipa liña ministeriál atu book-an lalais, ba ekipa munisípiu hodi ajuda família responde imediata ba situasuan ne’e, nomós ekipa saúde hamutuk ho Ministériu sira atu nune’e tanba Primeiru Ministru mós hakarak rona diretamente informasaun iha terenu
“Señor Primeiru Ministru orienta ba Ministra saúde para tenke fó atensaun sériu no konfirma ke’e ho kle’an razaun sira ba falesimentu señora nian para esklarese ba povu motivu loloos ne’e saida, ne’e kauza tanba vasina ou la’e”, hakotu nia.
Jornalista : Juvita dos Santos
Editór : Agapito de Deus
