Lafaek News—Moris iha mundu ne’e, haksolok iha tempu balun de’it, triste mak nakonu bainhira infrenta situasaun ne’ebé defisil ba osan, ai-han laiha, no kondisaun uma ne’ebé la seguru, realidade moruk ida ne’e Zelia dos Santos ho nia kaben Olandino M. dos Santos Ribeiro inklui oan na’in 4 kesi kabun husi dadeer too kalan foin han dala ida.

Dadeer too kalan sosa foos haknauk ho dolar ida ($1.00), tein hodi han hamutuk iha tempu kalan hafoin deskansa, maibé iha loron aban dadeer to kalan kontinua kesi kabun too fali kalan.

Zelia dos Santos idade 34 ho nia kaben Olandino M. dos Santos Ribeiro 37, sofre moras asma, iha oan hamutuk nain hitu (7) tanba kondisaun moris oan primieru no segundu ba hela ho nia avo sira iha munisípiu Likisá  hodi eskola no oan datolu hela ho nia tian iha Ermera maibé la eskola, nain haat ne’ebé idade sei ki’ik máka hamutuk ho inan-aman iha aldeia Beto-Tasi suku Madohoi, postu administrativu Dom-Aleixo, Munisípiu Dili.

Situasaun ekonomia iha uma kain ne’e krusial tebes, Olandino ne’ebé nu’udar xefe familia sofre hela moras iis boot (Asma), nune’e labele halo servisu atu bele sustenta uma laran iha ámbitu serka sanitaria ne’e.

“Ami nia hahán uma laran hanesan foos so sorti de’it, tempu di’ak bele hetan foos saka ida, mas tempu araska los ona pasiénsia loron ida han foos $1 dollar nia folin, agora loron haat ona foos laiha los,” Zelia dos Santos, esplika ho mata wen ba lafaek news iha nia rezidénsia Beto-Tasi foin lalais ne’e.

Zelia ho Olandino nia atividade loro-loron máka fila rai kuda modo móstarda, kankun, feuk dikin no baiaun, maibé dala ruma ema la sosa,  sorte di’ak lorona ida ema sosa too dolar rua hodi sosa fali foo stein han hamutuk ho oan nain hat iha oras kalan, maibé iha tempu ne’ebé la di’ak loron ida hetan de’it dolar ida ($1.00).

“Tempu modo ita faan ema sosa barak foos saka ida no mina centavus $50 ita bele hetan, máka laiha ita kala mate ho hahan $1 dollar nian de’it, se laiha los ona, ha’u halai ba husu iha xefe aldeia tanba hanesan ha’u nia apa bot, ha’u husu apa boot ajuda netik $1 mai ami sosa foos, se la iha ami mai tur hateke malu de’it atu han saida,” nia koalia ho mata ween.

Situasaun ne’e hanesan koko ida husi maromak ba uma kain ne’ebé lidera husi Olandinu ho Zelia, loron-kalan Zelia nu’udar inan hamonu matan-wen iha kada oras too kalan, tanba dala ruma ahi matan la tiding netik sanan ruma iha fatuk lalian tolu ninia leten husi dadeer too kalan.

“Nia moras asma no servisu todan mós nia labele kaer, uma mós nia labele halo no rai mós labele kee to’o labarik mós nia labele haree, tanba ha’u nia katuas oan moras ha’u labele karega, se tempu di’ak nia ba servisu tesi besi de’it la halo servisu todan ida, besi ne’e nia ba hili badak-badak ne’e lori mai faan fali haat $1 dollar, ema peskador sira máka sosa, ne’ebé nia dehan husik ba sira bolu ha’u hanesan nee para tesi ema nia besi nepara badak ita lori mai ema sosa karik ita sosa fali foos,” Zelia konta.

Moras iis boot ne’ebé afeta ba Olandino sei iha idade joven too agora, maske halo ona tratamentu iha sentru saúde sira no Hospital Nasional Guido Valadares  rasik, maibé la deteta nia moras,  moras ne’e mósu to’o loron 5 máka foin di’ak, se ai-moruk iha entaun bele ajuda reduz lalais mear ne’ebé provoka iis sa’e maka’as.

Ho problema saúde Olandino nian, Zelia máka tenke halo servisu ne’ebé dobru hodi hari’i uma ho medida 4×4, kalen ne’ebé taka iha uma leten balun hili tutan no balun ajuda husi xefe aldeia, maibé kondisaun uma la seguru ona, tanba kleur ona, tan ne’e kalen balun aat, no ripas, ai-rin inklui didin ho piku no kalen mós dodok no lahuk da-daun ona.

“Uma hanesan ne’e kuandu tempu udan been tun mákas kalan ami la toba, tanba kalen kuak hotu ona no didin sira mós dodok ona, ne’e ami tur hein de’it to’o udan no anin para, kalen ne’ebé taka uma ne’e ami ba foti iha sefe aldeia nia uma, uza máka resin ami ba husu foti mai taka uma ne’e, ami atu halo uma di’ak, maibé osan laiha susar tebes atu halo uma di’ak, ne’ebé atu hela iha uma aat mós pasensia hela ona,” nia espresa.

Fatin ne’ebé Zelia ho nia kaben no oan sira deskansa ba iha kama rua halo ho aikabelak no aubetu maibé rin komesa malahok, nahe de’it biti iha leten hodi deskansa iha tempu kalan, uma tali no dapur Zelia máka halo hotu tanba laen moras asma labele kaer servisu maibé iha defisil nia obriga an tenke halo servisu ne’ebé kamaan nia.

 “Ami la husu buat barak hakarak hadia netik ami nia uma ne’e no ajuda netik hahan uituan, tanba ha’u nia kaben mós moras hanesan ne’e ami la servisu osan laiha atu halo uma no hola hahan ruma,” nia husu tulun.

Iha fatin hanesan xefe aldeia Beto-Tasia Afonso Rodrigues, hatete, nu’udar autoridade lokal observa los duni sira laiha kbi’it atu sustenta ba familia uma laran susar tebes atu hetan osan.

“Ha’u loro-loron observa sira nia vida moris atu sustena ba sira nia an no labarik sira araska tebes, liu-liu hahan uma laran, tanba modo ne’ebé kuda dala ruma ba faan ema sosa to’o $2 dollar, hodi ida ne’e sosa foos rahun de’it no mina, dala barak ha’u hare’e lori osan $1 dollar ba han loron ida nia de’it, mas sira atu sosa foos saka ida tomak ne’e laiha, ” dehan xefe suku.

Nia hatutan, dala barak liu sempre ba uma husu ajuda, ami ajuda uituan ba sira maibé ida ne’e la augenta ba sira loro-loron nian.

“Dala ruma laiha liu ba husu ha’u, apa boot fo netik $.1 ida ba ami atu sosa aimoruk, maibé ba la sosa ai-moruk sosa foos rahun hodi tein ba han ho labarik sira,  se laiha loos sira ba husu foos ha’u fo uituan ba sira, kalen mós sira ba husu ha’u fo tahan ida rua hodi satan netik udan no loron,” xefe aldeia ne’e relata.

Xefe aldeia mós rekomenda ba ukun nain sira loke matan ba no haree povu sira ne’ebé moris kbi’it laiha atu hadia uma, no hahán laiha inklui laiha ekonómia atu suporta oan sira nia futuru.

Iha observasaun lafaek news iha terrenu nota família Zelia ho nia kaben Olandino (moras asama) hamutuk ho oan nain haat, laiha ona nesesidade bázika atu sustenta ba moris loron-loron tanba haree ba karon ne’ebé iha dapur laran mamuk, dala ruma husi dadeer too kalan ahi matan la suar.

Jornalista : Pedro de Almeida

Editor       : Agapito de Deus