Lafaek News–Grupu Traballu Tékniku (GTT) Segunda (21/06/2021) hasoru malu ho Primeiru Ministru (PM), Taur Matan Ruak, hodi aborda kona-ba solusaun ba dezastre naturál ne’ebé akontese iha Timor-Leste, liu liu iha loron 4 fulan-abril tinan 2021.
Koordenadór GTT Benjamin H. Martins hateten, Liuhosi enkontru ne’e Primeiru Ministru enkoraja sira hodi buka solusaun ba dezastre Naturàl ne’ebé akontese iha Timor Leste iha loron ha’at fulan Abril foin lalais ne’e.
“Primeiru Ministru bolu ha’u mai atu relata hela traballu sira ne’ebé mak atu koordena, iha ne’ebé Primeiru Ministru enkoraja nafatin ami atu fó solusaun ba dezastre sira liuba ne’e,” tenik Koordenadór GTT, Benjamin H. Martins, hafoin hasoru malu ho PM Taur iha ninia rezidénsia Farol Dili, segunda (21/06/21).
Enkoraja mós sira, liuliu enjeñeiru sira atu dezenvolve téknika sira ne’ebé mak sira rasik bele halo hodi bele ajuda atu alevia todan ne’ebé mak Timor-Leste sofre iha loron 04 fulan Abril liuba.
Koordenadór ne’e akresenta, servisu tékniku ne’ebé oras ne’e halo fahe ba nível emerjénsia nian liuhosi limpeza no prosesu remata ona no hein de’it prosesu pagamentu.
Nune’e iha mós projetu 8, ida mak kompleta tiha ona iha Embaixada Japaun nia oin, konklui ona pursentu atus ida (100%) hein prosesu pagamentu no iha tan projetu 4, kona-ba ponte sira iha Dili laran, ne’e Komisaun Administrasaun Konsellu Administrasaun husi Fundu Infra-estrutura (KAFI) mós aprova ona, hein atu lori ba prosesu aprovizionamentu
“Iha ida ponte CPLP nia sorin, jeometrikamente ultrapassa altura ne’ebé mak ba mai uza, kuaze metru 13, ne’ebé nia solusaun téknika ne’e sei iha prosesu estuda hela, maibé besik remata, atu lori ba Agência Dezenvolvimento Nasionál,” relata nia
Nia salienta, sira sei identifika no rekolla dadus no fatin hodi halo dezeñu ba rekuperasaun infraestrutura sira ne’ebé mak aat. Dadus sira ne’e, iha relasaun liu ho tékniku atu avalia halo nusá exemplu, estrada mak aat ka, presiza troka hotu ka, hadi’a balu de’it, hafoin hosi dadus sira ne’e mak sei fó solusaun tékniku tuir estragu ne’ebé iha.
Enkuantu, GTT enjeñeiru Timoroan sira iha Miniteriu Obras Públika (MOP) hahú da-daun atu bele dezenvolve rasik kapasidade aproriadu hodi fó solusaun imediata ba impaktu dezastre natural.
“Kona ba ponte Loes, tanba ninia kompleksidade bo’ot, nune’e husi parte Project Management Unit (PMU) sei dezeñu ba ponte refere. Aleinde ne’e, sei halo identifikasaun ba dadus hosi estragu sira iha kapitál Dili, nomós iha munisípiu Manatutu, Likisá ho Bobonaru, inklui parte Kosta Sul,” hakotu nia
Jornalista : Juvita dos Santos
Asisten Editor : Felisberto Fernandes
