Lafaek News— Kuarta (09/06/2021),Kompania Telin Timor-Leste (Telkomcel) oferese ekipamentu ho naran GeNose C19 unidade rua (2) ba Ministériu Saúde liu husi DNASH uza hodi detekta virus Covid-19.
Ekipamentu GENOSE C19 ho unidade rua ne’ebé Telkomcel oferese ba Ministériu Saúde ne’e produs husi peskizadór Universidade Gajah Mada (UGM) Indonezia no ekipamentu GeNose C19 ne’e entrega diretamente husi reprezentante Jestaun TelkomcelTimor-Leste, Oscar Lusio – Gerenti Corporate Communication, Billing & Collection no Joana Miranda – Gerenti Entreprises & Wholesale, no simu direitamente husi dotor Nilton do Carmo da Silva, SpoT, MBiomed, hanesan Koordenador Pilar VII COVID-19 iha Timor-Leste iha nia servisu fatin Kaikoli Dili.
Iha oportunidade ne’e, Oscar Lusio hato’o obrigado wain ba Kordenador Pilar VII Covid-19 iha Timor-Leste, Nilton do Carmo da Silva SpOT, MBiomed, ne’ebé fo ona konfiansa no oportunidade ba Telkomcel atu kontribui no oferese apoiu kombate distribusaun virus Covid19 iha Timor-Leste.
GeNose C19 rasik hanesan ekipamentu ida ne’ebé utiliza hodi ajuda detekta moras ou infesaun Covid-19 ho lais, akurasia no barratu no mos sei fo benefísiu ba ema hotu.
“Ami espera ho ekipamentu GeNose C19 ida ne’e bele ajuda prosesu filtrajen (processu screening) hodi detekta ho lais no bele haketak ema sira ne’ebé saudavelmente nomos ho ema sira ne’ebé hetan infeksaun moras Covid-19. Prosesu ida ne’e diak tebes hodi kria kondisaun seguru, konfortavel nomos obejtivo hodi oferese solusaun prevensaun husi moras Covid-19,” katak Oscar Lusio hafoin entrega ekipamentu 2 ba Ministériu Saúde iha Kaikoli.
Oscar justifika, GeNose C19 nia servisu hodi detekta Volatile Organic Compound (VOC) hanesan formadu ida tanba iha infesaun Covid-19 ne’ebé sai husi ema nia iis ba iha saku espesial, depois prosesu sei kontinua identifika liu husi sensor depois maka dadus sira ne’e sei prosesa ajuda husi intelijénsia artificialmente nian (artificial intelligence).
Ho detekta virus Covid19 ne’ebé lais ekipamentu ida ne’e mos iha presaun aas bele garantia kompara ho metodu testu Covid-19 sira seluk.
Iha fatin hanesan, koordenadór Pilar VII Covid-19 Timor-Leste, Nilton do Carmo da Silva, SpOT MBiomed hanesan reprezenta husi Diretór Jerál apresia tebes ho inisiativu husi kompañia Telkomcel no optimista katak ekipamentu GeNose C19 bele ajuda Ministériu Saúde hodi minimaliza transmisaun moras virus Covid-19 iha Timor-Leste.
“Ami hato’o obrigado wain ba kompania Telkomcel ne’ebé ho konsistente oferese ona apoiu hodi suporta ami nia servisu liuliu hodi uza ekipamentu GeNose C19 ba prevensuan transmisaun virus Covid-19 iha Timor-Leste,” dotor ne’e afirma.
Tuir Nilton do Carmo da Silva, SpOT, MBiomed, Timor-Leste, sei nafatin kontinua sevisu no esforsu masimu hodi kombate moras virus Covid-19. Husi etapa balun persija antisipa no nafatin konsistente tuir regras protokolo saúde ne’ebé tuir padraun no rekomendasaun husi Ministériu Saúde Timor-Leste.
Editór/Jornalista : Agapito de Deus
