Lafaek News–Primeiru Ministru Taur Matan Ruak, ohin kinta (14/10), hala’o reuniaun ho Prezidente Repúblika, Francisco Guterres Lú Olo hodi ko’alia kona-ba situasaun Covid-19 no kampañia vasinasaun iha Timor-Leste.
Primeiru Ministru Taur Matan Ruak hateten, situasaun atual iha hela Estadu Emerjénsia embora fleksibiliza, kazu covid-19 iha nivél nasionál ativu 200 resin, maibé situasaun serka sanitária no konfinamentu obrigatóriu laiha.
Ita dadaun ne’e iha hela estadu emerjénsia embora ita fleksibiliza hela situasaun, tanba ne’e mak ita haree hela se nesesidade redusaun ne’e makaas, laiha ona nesesidade naturalmente ita bele desmantela, mais enkuantu seidauk hau hanoin ita sei kuidadozu loos,” dehan Xefe Governu ne’e hafoin remata enkontru semanal ho PR iha Palasiu Prezidente Bairo-Pite Dili, kinta (14/10/21).
Primeiru Ministru Taur Matan Ruak hatoo parabens ba munisipiu Dili, tanba simu ona vasinasaun primeira doze no segunda dozes, ne’e kuaze ultrapasa porsentu 70 resin.
Persentajen vasinasaun iha nivél nasionál ne’e seidauk atinji 70 pursentu, pratikamente, nivél nasionál segunda doze 40 i tal pursentu, primeira doze ne’e 60 i tal, ita sei dook liu husi ita target ne’ebé ita hakarak, espera dezembru ne’e ita sei atinji 80 pursentu, nune’e diak tanba bele ajuda ita atu normaliza fila fali situasaun, liu-liu fasilita fali ita ba atividades tinan oin eleisoens prezidensiais nomós atividades ekonomikas,” informa Primeiru Ministru Taur Matan Ruak.
Enkuantu Prezidente Repúblika rekomenda ba Primeiru Ministru Taur Matan Ruak katak vasinasaun ne’ebé iha tenke vasina hotu, tanba ne’e esforsu halo hela no espera katak bele aplika hotu vasina ne’ebé iha, ne’eduni vasina ne’ebé iha too agora ema simu vasina hamutuk 1.3 millloens, besik rihun atus haat seidauk aplika.
Jornalista : Juvita dos Santos
Editór : Agapito de Deus
