Lafaek News–Prezidente Partidu Congresu Nasional Rekonstrusaun Timor (CNRT), Kay Rala Xanana Gusmão, hateten ukun ida ne’e folin la’ek, tanba ema matenek-nain sira ne’ebé hakerek konstituisaun mak sama fali konstituisaun ba rai.
Lider karizmátiku Xanana Gusmão, hatoo asuntu ne’e iha lansamentu númeru sorteiu kandidatu Prezidente Repúblika períodu 2022-2027, Premiadu José Ramos Horta ho sorteiu númeru 14, iha Osindu 1 aldeia Fatumeta suku Bairu Pite, hodi dehan ukun an ida ne’e la tuir funu nain sira ne’ebé mate tanba ukun ne’e, tanba ema matenek-nain sira ne’ebé hakerek konstituisaun RDTL mak sama rasik konstituisaun.
Ohin loron ita haree ukun folin laek liu, foin laek liu, tanba sira ne’ebé hakerek konstituisaun ne’e mak sama fali konstituisaun,’’ dehan lider karismátiku Kay Rala Xanana Gusmão.
Xanana Gusmão dehan, ema sira ne’ebé mate ba ukun ne’e too ohin loron ruin buka la hetan, la hatene ba hotu tasi karik, sira mate hakarak Timor hamrik hanesan nasaun soberanu hanesan rai seluk, maibé ukun ne’e valor laiha tanba sira ne’ebé hakerek konstituisaun ne’e mak sama konstituisaun ba rai.
Tanba ne’e, ha’u kontente tebes, ha’u kontente la’os atu ko’alia de’it ho joven sira, joven sira iha valor duni futuru iha imi nia liman, maibé prezente ne’e mak ferik katuas sira fuuk mutin ne’e, povu ne’e terus, ita hakarak fo onra ba nia terus no onra ba povu nia mehi, bele harii rai ne’e, más tenke tuir regras uituan,’’ katak eis prezidente repúblika dahuluk ne’e.
Ho razaun hirak ne’e, CNRT hadia fali sistema nasaun hirak ne’ebé sira sama, CNRT fó fiar ba José Ramos Horta kandidata an fila-fali hodi hadia hikas sistema konstrusaun estadu no konstrusaun nasaun, hadia hikas ai rin soberanu hat ne’ebé la’o la tuir regras, no mós onra ba povu nia luta atu hadia sira nia moris ho dignu.
Observasaun lafaek news iha lansamentu kandidatu Prezidente Repúblika José Ramos Horta ho númeru sorteiu 14, hetan partisipasaun másimu husi estrutura nasional partidu CNRT ho kuadrus sira hotu, inklui militantes no apoiantes kandidatu ho númeru 14 ne’e.
Jornalista : Azelio da Cruz
Editor : Agapito de Deus
