Lafaek news–Uniaun Profisaun Jornalista Timor-Leste (UPJTL), tersa-feira (18/12) realiza kongresu dahuluk ho seminariu, tema dezafiu no papel media iha dezenvolvimentu hodi halo advokasia di’ak ba Jornalista sira divulga informasaum di’ak ba públiku.
Prezidente Komisaun Instaladora (UPJTL), Xisto Freitas da Piedade, hateten, misaun husi UPJTL maka oinsá bele akompaña bele halo advokásia ida di’ak ba Jornalista sira ne’ebé maka loro-loron iha terenu ho knaar divulga informasaun di’ak ba públiku.
“Ita hakarak Jornalista sira ne’ebé maka halo kobertura ne’e bele dignu, tanba durante ita haree Jornalista sira alvu ba problema tantu fontes sira nomós empregador sira, buat sira ne’e maka asosiasaun ne’e mosu kompleta asosiasaun sira ne’ebé maka iha ona sai hanesan advokasia sentru ida ba kolega sira bele halo sira nia servisu ho dignu,” dehan Prezidente Komisaun Instaladora, Xisto Freitas, ba Jornalista sira iha Salaun MSSI Kaikoli Dili, sesta (17/12/21).
Nia informa, inisia asosiasaun ida ne’e iha kriteria ho sasukat ne’ebé maka iha, primeiru tanba inisiativa, segunda iha baze tanba konstituisaun iha artigu 43 koalia konaba liberdade asosiasaun tanba ne’e konstituisaun fô dalan.
“Media barak ona iha Jornalista mos barak ona kada media ida Jornalista 30 to 50 ba leten, entaun durante ne’e ita haree iha asosiasaun rua de’it AJTL ho TLPU, durante ne’e asosiasaun rua ne’e mos halo esforsu ida ke iha sira esforsu duni, halo advokasia ba kolega sira ne’ebé maka enfrenta problema ho fontes no empregador sira ida ne’e mós ba ami haree seidauk sufisiente, entaun ita presiza reforsa tan asosiasaun ida para bele tulun tan asosiasaun sira bele kontribui di’ak liutan oinsá bele tau matan di’ak liu ba kolega jornalista sira ne’ebé maka halo kobertura ho dignu” informa Nia.
Iha Fatin hanesan, Inspektor Gabinete MAPKoms Orlando da Conceição, informa, governu sempre fó apoiu ba organizasaun jornalista sira, governu kompremete servisu hamutuk oinsá bele ajuda organizasaun ne’e kontribui eleva nia kapasidade komunikasaun sosiál sira nian.
“Governu kompremete servisu hamutuk oinsá bele ajuda organizasaun ne’e kontribui eleva ba ita nia kapasidade komunikasaun sosiál sira nian,” dehan Nia.
Enkuantu iha momentu istóriku ne’e maka kongresu ne’e atu hahú sira nia ezisténsia atu legaliza sira nia ezisténsia, klaru sira sei eleva sira nia estrutura no estrutura iha sira legalija an iha notariadu nune’e asosiasaun ne’e moris ona, governu iha kompromisiu boot hakarak servisu hamutuk ho asosiasaun Jornalista sira.
Entretantu iha Kongresu dahuluk ba UPJTL ho semináriu ne’e hetan partisipasaun másimu husi Universidade Nasionál Timor Lorosa’e (UNTL), Universidade Orientál Timor Lorosa’e (UNITAL) no EUROS inklui Jornalista balun ne’ebé servisu iha média.
Jornalista : Azelio da Cruz
Asisten Editora : Juvita dos Santos
