Lafaek News–Ohin 08/12/2021, udan ho intensidade normal iha kapitál Dili durante oras rua, hahú husi 11:30 to’o 14:00 provoka tahu dodok nakonu iha estrada nasional rezulta engarrafamentu transporte halai hanesan nehek.
udan oras rua nia laran, jornalista lafaeknews hala’o observasaun jeral iha sidade Dili hodi haree estrada protokolu diresaun Komoro iha parte Rotunda Nicolao Lobato, hafutar ho bee nalihun iha ne’ebé fukun husi barrajen nia kloot laiha kapasidade atu akumula bee hirak ne’ebé suli husi kadak sira husi foho lolon nakonu iha estrada laiha dalan atu sulin an ba tasi leun.
Aliende ne’e nomós iha diresaun Tasi Tolu, bee nalihun no tama to’o komunidade nia uma, hanesan iha Karantina Tasi Tolu no provoka mos engarrafamentu iha area refere.
Iha sorin seluk, iha estrada diresaun Balide nakonu ho tahu ne’ebé bee lori husi foho leten, difikulta movimentu transporte públiku liuliu mikrolehalai husi diresaun Taibessi ba Ailok-laran no Manleuana maske nune’e komunidade ho konsiénsia ida-idak hamoos nia uma oin hodi prevene bee tama uma laran.
Iha diresaun Katedral to’o iha Palasíu Prezidensiál, bee nalihun iha estrada klaran too edifisiu Palasíu Prezidensiál nia oin nakonu ho debu.
Antes ne’e Ministériu Transporte no Komunikasaun (MTK), liuhusi Diresaun Nasional Meteorologia Geofíziku (DNMG) alerta ona ba populasaun Timor laran tomak, ba populasaun sira ne’ebé hela iha area foho husi kosta Sul no Norte Timor nian, atu matan moris neon nain, hadook-an husi fatin risku, tanba posibilidade sei mosu udan ho intensidade moderadu to’o forte akompaña ho anin boot, sei hahú husi loron 07/12/2021 to’o loron 10/12/2021.
Jornalista : Egidio Nono
Editor : Agapito de Deus
