Lafaek news—Kbiit laek faluk Feliciana Mendonça, ho idade 73 husi suku Kaikoli aldeia Sentru Unidade 01, kada loron tuur iha trotoar diresaun eis merkadu munisípiu Dili no Ministériu Transporte Telekomunikasaun ninia oin hodi fan netik bua ho malu hodi hatutan moris loro-loron.
Faluk Feliciana Mendonça tuur iha trotoar leten kuaze tinan 10 ona, maske loron be mana, sadere-an iha moru protesaun Ministériu Transporte Komuniksaun ninian hodi fan, Bua malus no ahu, nesesidade moris obriga inan faluk ne’e tenke habai- an iha manas-laran, buka osan uitoan bele responde nesesidade moris nian.
“Ha’u fan iha ne’e besik tinan sanulu resin ona, osan sira husi ema hola bua malus ne’e hodi hola hahan tamba buat hotu osan, loron ida ema sosa dolar 5 too 6, osan sira ne’e hau sosa mina, masin ho modo, maibe se ema la hola pasiensia fila ba uma han etu maran,” faluk Feliciana hatun lia hirak ne’e ba Lafaek News, iha rotunda Franacisco Xavier eis merkadu municipal Dili foin lalais.
Inan faluk ne’e dehan, moris ne’e tenke esforsu, tempu osan mean, loron tomak ida tenke badinas buka osan, bainhira tuur de’it iha uma, sei la hetan buat ida, maibé badinas selu bele hetan netik osan rahun uituan hodi bele ajuda sustenta moris.
Dala ruma nia sente triste, bainhira jestaun munisipiu Dili prende tiha bua ho malus ho ahu ne’ebé nia faan soe hotu ba kareta laran hodi lori ba soe iha lixu Tibar, tanba inan faluk okupa hela trotoar leten hodi buka ninia moris.
“Ha’u nafatin fan iha tanba ha’u laiha ona forsa atu la’o ba fan iha merkadu, durante ha’u tuur iha ne’e, labarik sira eskola ne’e liu ba liu mai, balun fo 1 dolar balun fo 50 cent, no balun hanoin ha’u sira sosa etu ba ha’u, maibe ema boot sira liu ba liu la hateke ha’u, ha’u fan iha ne’e hahu husi tuku rua lokraik, bainhira haree ema hatun Bandeira ha’u foin fila ba uma,” inan faluk ne’e haktuir.
Iha parte seluk xefe Aldeia sentru unidade 01, Julio Pereira mos rekoñese, kleur ona Inan kbi’it laek Feliciana Mendonça fan Bua ho malus no ahu, iha moru hun Ministériu Transporte Komunikasaun ninia oin, buka osan atu bele sustenta nia moris lor-loron nian, tanba Feliciana hanesan Inan faluk no kbi’it laek ida iha aldeia ne’e.
” Ferik Feliciana nia moris nia fan mak hanesan ne’e duni, nia iha uma nia mesak nia faluk nia iha oan mane rua hola feto hotu ona maibe nia oan mane servisu iha projetu baibain, ne’ebe ferik ne’e buka rasik ninian, kaundu iha ajudus ruma husi Governu mai iha aldeia, ferik Feliciana mak ha’u tau hanesan ema ne’ebe prioridade primeiru, no ha’u sempre ko’alia ba ferik oan mane atu haruka ferik deskansa, maibe oan dehan sempre ko’alia, maibe ferik la rona, se nian oan ko’alia la rona sa tan ha’u, maibe ferik simu ona kalen no ai husi ajudus Governo nian,” xefe aldeia ne’e haktuir.
Iha Observasaun Lafaek News, nota kbi’it laek faluk Feliciana Mendonça faan bua ho malus no ahu iha loron manas-laran no laiha ai mahon balun mak atu satan netik inan faluk ne’e, pasiénsia faluk sadere dei’it ba iha moru hun ministériu transporte no telekomunikasaun nian hodi halo nia atividade negósiu.
Jornalista : Mateus F.de Deus
Editor : Agapito de Deus
