Lafaek News—Ajénsia Teknolojia Informasaun no Komunikasaun (TIC TIMOR I.P-sigla Portugéz) sai ajenda reforma administrasaun públika alista implementasaun husi sistema Identifikasaun ÚnikA modernu ida nu’udar komponente xáve ba implementasaun husi Governu Eletroniku (output 1.5 husi Programa Reforma Administrasaun Públika (2019 to’o 2023)) hodi konsidera benefisiu bo’ot ne’ebé sistema ne’e sei fornese.
Tanba ne’e, TIC TIMOR liuhosi Diresaun Identidade Úniku sei hala’o atividade sosializasaun programa Identidade Úniku nudar Identidade dijitál ida ba autoridade sira iha postu administrativu 6 iha Munisípiu Lautém ne’ebé sei realiza iha loron tersa-feira, 21 to’o 29 marsu 2023.
Iha sosializasaun ida-ne’e, Diretór Diresaun Identidade Úniku sei halo abertura ba programa sosializasaun iha Minisípiu Lautém, partikularmente iha postu administrativu Losplaos, iha loron tersa-feira, 21 Marsu 2023.
Diretór Diresaun Identidade Úniku, Florindo Guterres da Costa, ne’ebé lidera koordenasaun ho Administradór Munisípiu Lautém, hetan apoiu mós husi Koordenadór Komunikasaun Interinu no Community Outreach, Diogo de Jesus Carvalho, ne’ebé halo koordenasaun ho autoridade lokál ka grupu tarjetu sira ba sosializasaun. Alende sosializasaun Programa ID Úniku, sei enkaixa mos aprezentasaun programa Timor Digital 2032, ne’ebé sei aprezenta husi Sonia P. R. Leite (Asesor Nacionál), nomós ekipa husi Diresaun ID Úniku.
Ajénsia TIC TIMOR I.P., nu’udar Institutu Públiku ida ne’ebé tutela ba Primeiru-Ministru, no lidera husi Diretór Ezekutivu ho ninia natureza jurídika ne’ebé maka iha autonomia administrativa, orsamentu no patrimóniu rasik tuir Dekretu Lei númeru 29/2017..
Ajénsia TIC TIMOR iha misaun hodi implementa polítika no estratéjia ne’ebé maka aprova ona iha matéria kona-ba Teknolojia, Informasaun no Komunikasaun, hodi jere rede informátika Governu nian no Entidade Públiku sira seluk, inklui halo jestaun ba infraestrutura teknolojia, informasaun no komunikasaun no fó apoiu iha área Teknolojia, Informasaun no Komunikasaun no Sistema Informasaun nian.
TIC TIMOR I.P. liuhusi Diresaun ID Úniku hahú implementa Programa Identidade Úniku (IDU) ne’ebé sei hala’o rejistrasaun ba sidadaun Timor-Leste, nomós rezidente sira hotu ne’ebé hela iha Timor-Leste. Iha prosesu implementasaun ne’e, Diresaun ID Úniku sei hala’o sosializasaun ba Programa Identidade Úniku (IDU) iha territóriu Timor laran.
Tanba, sistema ID Úniku permite governu atu hadi’ak atendimentu servisu públiku, hadi’ak jestaun no koordenasaun polítika sosiál sira. Nune’e permite governu no setór privadu atu identifika di’ak liu ninia sidadaun sira, no ema sira iha ninia rai-fronteira laran hodi responde ba pergunta sira hanesan “Ita mak sé?”, “Ita mak ema ne’e duni ka la’e?”.
ID Úniku hanesan identidade dijitál ida ne’ebé sei uza hodi identifika no auténtika ema ida nia identidade. Iha ne’e ID Úniku ka ID Dijitál sei konsiste husi: Númeru ID Úniku (NIU) hó díjitu 10 (kria aleatoriamente), Informasaun biográfiku (naran, data moris, no fatin moris) no Informasaun biométriku (finger-print/liman fuan, imajen Oin/Facial image no iris/matan).
Atividade sosializasaun Programa ID Únika sei hetan partisipasaun husi Administradór Postu, Xefe Suku, Xefe Aldeia no Funsionáriu destakadu sira sei hala’o iha Salaun Postu Administrativu sira iha Munisípiu Lautem hetan partisipasaun husi Administradór Munisipal Lautém, Autoridade Lokál Postu Administrativu Lospalos, Autoridade lokál Postu Administrativu Lore, Autoridade lokál Postu Administrativu Iliomar, Autoridade lokál Postu Administrativu Tutuala, Autoridade lokál Postu Administrativu Lautem, Autoridade lokál Postu Administrativu Luro, Xefe Suku, Xefe Aldeia, Xefe Administrasaun lokál sira, Xefe Finansas lokál, Xefe Planu no Dezenvolvimentu Lokál, Xefe Dezenvolvimentu Komunitáriu lokál, Reprezentante Tékniku Sektorál MSS, PNDS, Parseiru Dezenvolvimentu, Korpu Seguransa, Saúde, Edukasaun no Desportu sira iha Postu Administrativu sira.
Tarjetu ba Sosializasaun sistema Dijitál ne’e sei hala’o iha salaun postu Admnistrativu sira Munisípiu Lautém, ne’ebé sei partisipa ema hosi ema na’in .410 tuir estimasaun ne’ebé iha fahe ba Postu Aministrasaun Lospalos iha ema na’in-98. Postu Aministrasaun Tutuala hamutuk partisipante 45, Postu Aministrasaun Iliomar ho totál 67, Postu Aministrasaun Lore iha 45, Postu Aministrasaun Lautem mak hamutuk ema na’in-92, no Postu Aministrasaun Luro iha ema hamutuk 63.
Antes ne’e Diresaun IDÚ mós halo ona sosializasaun ba parseiru dezenvolvimentu sira, Ministériu sira, Universitáriu, no entidade relevante sira seluk hanesan: autoridade lokal sira iha postu administrativu sira iha Munisípiu Likisá, prezidente autoridade Munisipál Ermera, postu administrasaun sira iha Munisípiu Aileu, Ainaro, Rejiaun Autonomia Espesiál Oekussi Ambeno (RAEOA), nomós Prezidente Autoridade sira iha reunian Konsellu Koordenasaun Teritoriál. Sosializasaun ba programa ID Úniku no Timor Digital 2032 sei kontinua ba Munisípiu sira seluk no instituisaun sira hotu iha teritoriu Timor laran tomak.
