Lafaek News— IDÚ (17/07/2023)-Ekipa Identidade Únika (IDÚ) husi Ajénsia Teknolojia Informasaun no Komunikasaun (TIC TIMOR I.P-sigla Portugéz) kontinua hala’o atividade sosializasaun kona-ba implementasaun Programa Identidade Úniku ba autoridade sira iha Postu Administrativu ne’en iha Autoridade Munisipál Baucau.
Atividade sosializasaun ne’ebé hala’o iha Postu Adminustrivu neen mak hanesan Baucau Vila, Laga, Baguia, Quelicai, Venilale, no Vemasse ho objetivu atu hatutan informasaun ba autoridade lokál sira kona-ba Saida mak ID Unika no nia benefisiu sira bainhira implementa ona programa refere.
Tuir ajenda ne’ebé iha, sosializasuan loron dahuluk ne’ebé hala’o iha Postu Administrativu Baucau Vila (loron 18 fulan-jullu 2023), atividade sosializasaun loron daruak hala’o iha Postu Administrativu Laga (loron 19 fulan-jullu 2023), ba loron datoluk nian sei hala’o iha Postu Administrativu Baguia (loron 24 fulan-jullu 2023), loron dahaat nian sosializasaun hala’o iha Postu Administrativu Quelicai (loron 25 fulan-jullu 2023), atividade ba loron dalima iha Postu Administrativu Venilale (loron 26 fulan-jullu 2023) no ikus liu iha Postu Administrativu Vemasse (loron 27 fulan-jullu 2023).
Ba Sosializasaun Programa ID Únika iha Postu Administrativu neen sei hetan partisipasaun husi Prezidente Autoridade munisipál Baucau, Administradór Postu Adminstrativu, Xefe Suku, Xefe Aldeia, Xefe Administrasaun Lokál, Xefe Finansa Lokál, Xefe Planu no Dezenvolvimentu Lokál, Xefe Dezenvolvimentu Komunitáriu Lokál, Reprezentante Tékniku Setorál ministériu sira, PNDS, Reprezentante Saúde no Seguransa Postu sira no ajente administrasaun destakadu sira.
Ekipa sosializasaun ba programa ID Únika hamutuk ema na’in-lima no sei hetan partisipasaun masimu husi reprezentante sira iha postu Administrativu ho totál ema-na’in-hitunolu (70). Iha atividade sosializasaun ne’e sei loke direta husi Prezidente Autoridade Munisípiu Baucau bainhira hala’o iha Postu Baucau Vila no akompaña hosi Diretor Ezekutivu TIC TIMOR I.P via online. Altende ne’e, Administradór Postu Administrativu sira sei loke atividade sosializasaun iha Postu ida-idak nian.
Atividade ne’e iha aprezentasaun Jornada implementasaun husi Diretór IDÚ, Sr. Florindo Guteres da Costa, ba Materia Sosializasaun Programa IDÚ sei aprezenta husi Koordenadór Komunikasaun-IDÚ, Sr. Diogo de Jesus Carvalho.
Antes ne’e, TIC TIMOR I.P liuhusi Diresaun IDÚ mós halo ona sosializasaun ba parseiru dezenvolvimentu sira, Ministériu sira, Universitáriu, no entidade relevante sira seluk, nomós halao ona sosializasaun ba munisípiu balun hanesan iha Postu Administrativu sira iha Munisípiu Likisá, Munisipiu Ermera, Ainaro, Aileu no Lautém, Eskola Sekundáriu sira, Rejiaun Autonomia Espesiál Oekussi Ambeno (RAEOA). Ekipa IDÚ mós halo ona aprezentasaun ba Prezidente Autoridade Munisipál sira no Administradór Munisipál sira iha Reuniaun Konsellu Koordenasaun Teritóriál (KKT) iha Munisiípiu Lautein no sei kontinua ba Munisípiu sira seluk.
(MÍDIA_IDÚ)