Lafaek News– Primeiru Ministru Taur Matan Ruak, preukupadu variante foun delta-alpha iha ne’ebe tama ona iha Nusa Tengara Timur (NTT) nia area Kupang no Atambua ne’ebe vizinu kedan ho Timor Leste.
Taur Matan Ruak, ko’alia asuntu ne’e hafoin hasoru malu ho Prezidente Repúblika, Francisco Guterres Lu Olo, hodi ko’alia kona ba surtu COVID-19 no Variante foun ne’ebe dadaun iha ona nasaun Viziñu Indonesia.
” Husu kontinua fo atensaun ba ita nia sidadaun sira atu provenidu tuir protokolu ministeriu saúde no organizasaun mundial saúde nian hodi nune’e ita kontinua hases an husi moras ne’e por outru ladu labele falta ba Vasina hodi proteje ita nia an no komunidade sira,” hatete Primeiru Ministru Taur Matan Ruak iha Palasio Presidensial Bairo_ pite kinta 22/07/2021.
Taur apela ba Sidadun sira hotu atu bele konsidera no kuidadu an labele hetan moras COVID19 liliu ba Variante foun ne’e.
“Ha’u haree komunidade sira la tau ona maskara, livre ituan sira komesa, ha’u hanoin ita hotu bele rekonsidera, kuidadu an labele hetan moras ne’e i labele da’et ba ema seluk, ida ne’e mak ha’u nia pedidu no apela ba populasaun tomak,” xefe governu ne’e sublina.
Jornalista : Rita Moniz
Editor : Agapito de Deus
