Lafaek News—Sekretariu Estadu Protesaun Sivil (SEPS), Domingos Mariano Reis no Head Office UN WOMEN iha Timor-Leste Amy Nishtha Satyam asina nota entindimentu kona-ba partisipasaun iha empoderamentu ekonómiku feto nian ba rezilensia klimátika.
“Ami asina nota entindimentu ho UN WOMEN ne’e atu fortalese koperasaun entre UN WOMEN ho Protesaun Sivil entermus de kapasitasaun ba grupu feto sira oinsa, wainhira dezastre akontese, feto sira prepara ona atu bele responde no rekopera ba sira nia an no sira nia familia, bazeia ba relatoriu anual, Timor-Leste lakon nia rikusoin por volta dolar millaun 5.9 kauza husi dezastre. Tamba ne’e maka ita halo koperasaun ho parte hotu oinsa bele halo redusaun ba risku dezastre ne’e,” Dehan Sekretariu Estadu Protesaun Sivil (SEPS), Domingos Reis ba jornalista sira hafoin asina nota entindimentu iha salaun APC Caicoli Dili, sesta (20/09/2024)
Domingos Reis haktuir, planu prioridade ba nota entendimentu ne’e mak kapasita feto sira hodi bele hasa’e sira nia koñesementu kona ba kauza dezastre atu prevene no kuidadu bainhira akontesimentu ne’ebe la mosu la tuir esperansa nian, prevensaun risku dezastre ne’e, Protesaun sivil preve orsamentu dolar rihun walu nulu (80.000) ba tinan 2025 ninian ne’ebé liu husi Diresaun Nasional prevensaun no mitigasaun no UN WOMEN mós prepara apoiu orsamentu balun ne’ebé maka tékniku sira sei halo, sei elabora atu bele halo planu asaun ne’ebé mais detallu ba futuru.
Tanba mudansa kliimatika halo be’e matan balun maran feto sai vítima maka Protesaun Sivil ho UN WOMEN asina nota entindimentu atu fó edukasaun redusaun risku dezastre ba feto sira tanba ita hotu hatene feto ne’e parte ida feto vulneravel liu bainhira dezastre mosu.
“Dezastre mosu sira lakon sira nia vida, lakon sira nia rikusoin, lakon sira nia oan sira no lakon mos sira nia ekonómia família ne’e bele impede kresimentu ekonomia família ninian tamba ne’e maka foka liu ba grupu feto sira, kapasita feto sira liu husi edukasaun redusaun risku dezastre, hasa’e sira nia koñesementu kona ba risku dezastre, kauza dezastre no sinais dezastre, oinsa prevene, oinsa kuidadu wainhira dezastre akontese,” SEPS subline.
Iha fatin hanesan Head Office UN WOMEN iha Timor-Leste, Amy Nishtha Satya hateten, kratidaun ba Sekretariu Estadu protesaun sivil tanba bele loke odamatan ba UN WOMEN hodi halo kolaborasaun ne’ebé mak konkretiza hodi asina nota entindimentu ne’ebé foka liu partisapasaun feto iha redusaun risku dezaste no empoderamentu ekonómia feto nian iha rezilensia klimátika tanba esperiensia hatudu katak bainhira dezastre akontese ema ne’ebé sai vítima barak liu mak inan feton sira.
“Dala barak ko’alia kona-ba ba feto, ita halibur sira hanesan mós problema maibe sira mós sai solusaun tamba ne’e maka liu husi asina nota entindimentu ida ne’e atu servisu hamutuk ho Sekretariu estadu Protesaun Sivil atu foka liu ba area importante haat maka hanesan oinsa suporta téknika ba iha dezenvolvimentu rekursus ba iha formasaun sira kona ba redusaun risku dezastre ba feto sira nia rezilensia klimátika; fornese kapasitasaun kona ba redusaun dezastre ba inan feton sira; fornese kapasitasaun kona ba empoderamentu ekonómia feto iha rezilensia klimátika; no suporta Sekretariu Estadu Protesaun Sivil ba iha ninia implentasaun dezenvolvimentu planu asaun nasional no mos mata dalan polítika sira ne’ebé sensivel ba jéneru,” Nishtha salienta
Nota entendimentu ne’ebé asina la’os de’it dokumentus ida maibé tau iha pratika no implementa, depois asina UN WOMEN hakarak oinsa servisu hamutuk ho Sekretariu estadu Protesaun Sivil (SEPS) hodi implementa ba kokretiza ida ne’e atu nune’e bele tulun inan feton sira iha àrea remotas ne’ebe dezastre akontese vítima barak liu inan feton sira, nu’udar Inan feto sira partus senti Inan ida sai responsavel ba familia no oan sira, tanba ne’e tenke halo sira nia servisu loro-loron tein, kuru bee, dala ruma bee la iha entaun ida ne’e mós bele implika ba inan sira nia servisu, no halo todan liu tan ba sira nia servisu entaun ida ne’e mós lori violénsia kontra feto iha uma laran nian.
Liu husi asina nota entindimentu ne’e SEPS no UN WOMEN servisu hamutuk diak liu tan hodi tulun feto sira iha area remotas atu nune’e sira bele forsa liu tan bainhira hasoru rezilente ba iha mudansa klimátika iha Timor-Leste, edukasaun redusaun risku dezastre no empoderamentu ekonómia feto nian iha rezilensia klimátika ne’e sei implementa ba iha munisipiu tolu maka hanesan Ermera, Viqueque no Covalima.
Jornalista : Gracia Soares
Editor : Agapito de Deus
