Lafaek News–Ekipa kandidatu Prezidente Repúblika períodu 2022-2027, Mariano Assanami Sabino, selebra Valintine Day ho asaun oferese aifunan ba joven sira ne’ebé movimentu iha sidade Dili nu’udar símbolu domin kaer paz no estabilidade nasionál ba nasaun doben Timor Leste.
Portavoz ekipa voluntáriu Mariano Assanami Sabino, Pedro Ximenes hatoo liu husi konferénsia imprensa iha uma vitoria Mandarin, segunda (14/02/2022), katak ekipa ne’e hatoo ksolok-wain ba kolegas juventude hotu liu-liu povu Timor Leste, tanba loron 14 Fevereiru 2022, nu’udar espesial populasaun hotu iha Timor.
Ohin loron domin nian, husi ekipa voluntáriu uma vitoria Assanami, hatoo ksolok-wain ba kolegas, juventude sira, liu-liu ba povu Timor Leste tomak, objetivu konferénsia ida ne’e ba loron ohin 14/02/2020, lorin ida ohin populasaun tomak iha mundu, liu-liu foin sae sira selebra loron espesial ka ema hanaran valentine day,’’ dehan portavoz ne’e.
Portavoz ne’e hateten ba loron Valentine Day ne’e iha Timor Leste, juventude foin sa’e sira aproveita loron ne’e hodi hatudu sentimentu domin ba malu, liga ba situasaun ikus-ikus ne’e, iha Timor Leste, intensidu ne’ebé nakonu ho impaktu, sentidu domin dame entre Timor-oan sira, violénsia ne’ebé nakonu, violénsia barak liu tanba sira lakon vida domin nune’e ikus mai lakon mos ba moris dame.
Nudar Juventude ita foinsae, ita presija sai promotor autor ba kriasaun domin dame iha sosiedade, ita hotu orguilu ba ita nia rai, nudar nasaun foun ida, mai ho lema ida katak, adeus konflitu Benvindo dezenvolvimentu, ho lema ida ne’e ita hotu hakarak hakiak paz no dame, hakmatek nudar passu ida ita foti kontribuisaun dezenvolvimentu nasaun atu oinsa, bele atinje ita nia objetivu ba povu moris diak” katak Pedro Ximenes.
Pedro sublina, iha tinan ida ne’e mos, Timor Leste sei hasoru festa demokrasia iha rua eleisaun Prezidensial (ELPR) ho eleisaun parlamentar (ELPAR), nudar ekipa dame voluntáriu Assanami nian, husu ba Timor-oan tomak, liu-liu joven sai ai-rin ba nasaun, sai xave importante ba determinasaun atu haburas dame iha familia, sosiedade no ba nasaun.
Festa demokrasia, eleisaun prezidensial ita sei partisipa kontente ho ksolok, hametin demokrasia, tanba ne’e presija domin dame ho ida ne’e maka, ho ida ne’e maka ita sei lori rezultadu ida ne’ebé di’ak hametin estadu direitu no demokrátiku, iha ita nia nasaun Timor Leste, ami hakarak hatoo joven mos tenke sai motivador, ka inspirador, paz iha ita nia rai liu husi asaun, fahe Ai-funan, ne’ebe mak ohin ne’e hanesan parte ida fo ami nia kontribuisaun ba ita nia sosiedade atu oinsá bele harii dame domin ba ita nia sosiedade,’’ simbolu ida katak Ai-funan domin,’’katak nia.
Alenda ne’e mos ekipa Voluntáriu iha uma vitoria Assanami, la’os halo atividade fahe Ai-funan de’it, maibé fahe mos maskara ba komunidade sira inklui mos fahe aimoruk (baigon) ba nia populasaun Bekora atu kombate moras dengue.
Ida ne’e maka ami ekipa voluntáriu ninia asaun ba loron ida ohin, hodi selebra loron dame domin, ami nia liafuan simples ba ita hotu katak, ba ita boot sira ami nafatin iha dame ba imi, ami nafatin iha ami nia fuan no ita hotu sai ema ne’ebe promotor ba dame no domin iha Timor Leste, katak ita lae ba violénsia no lae ba konflitu,” hateten nia.
Jornalista MG : Azelio da Cruz
Editor : Agapito de Deus
