Lafaek News—Prezidente Repúblika liu husi Casa Sivil, tersa 30/04/2024, apoiu nesesidade bázika hanesan fos karum rua, manu tolun, mina, no osan ho montante 250 ba Inan feton Leonarda Ximenes hodi hasees an husi susar ho terus ne’ebe hasoru durante fulan 7 nia laran.
Iha oportunidade ne’e reprezentante Casa Sivil Presidensia Repúblika Adriano Valente Pires haktuir, palasiu prezidensia repúblika, liu husi Casa Sivil, durante ne’e akompania liu husi media Lafaek News, katak inan feton Leonarda Ximenes, sofre hela no hare mos nia oan ne’ebé iha hela Soibada, tanba nia kaben husik hela nia mesak no ba haksolok fali ho feto seluk.https://www.lafaeknews.tl/nilva-ho-nia-kolega-nain-hitu-oferese-nesesidade-bazika-ba-inan-feton-leonarda/
“Durante ne’e ami akompania liu husi media Lafaek News katak ita nia inan feto ne’e sofre hela no responsabilidade ba labarik na’in hira kedas nia katuas oan husik hela durante fulan hitu kedas nia laran, nia senti terus ba hahán entaun liu husi media lafaek news fo sai entaun iha ne’e kedas ita hetan orientasaun husi Prezidente Repúblika, liu husi Casa Sivil asunto sosiál ohin orienta ekipa ida ne’e lori netik sasán nesesidade bázika ho osan Dólar 250, atu hodi hatutan netik ita nia inan feton ne’e moris ba loron ida rua.
Reprezentante Casa Sivil, fundamenta Prezidente Repúblika, José Ramos Horta lamenta teb-tebes ho nia inan feton ne’ebé mak durante ne’e sofre ba nesesidade báziku moris nian, tanba nia kaben la’o sees husi hela nia moris mesak ho isin gravida.
“Ohin ekipa ida ne’e lori nesidade bázika mai apoiu pois ami fila ami sei lori informsaun ne’e ba hato’o ba iha señór Prezidente Repúblika hodi reencaminha ba iha ministériu relevante atu bele tau matan, oinsá mak fo apoiu kontinua ba iha problema sira hanesan ne’e,” nia sublina.
Ikus liu inan feton Leonarda Ximenes agradese tebes ba na’i Prezidente Repúblika José Ramos Horta ne’ebé fo ona apoiu Solidariedade ba nia liu husi Casa Sivil oferese osan no aihan Inklui sasán nesesidade bázika seluk atu bele hatutan netik moris ne’e labele hasoru susar.
“Ha’u agradese tebes ba nai Prezidente nia ekipa sira ne’ebé ohin tun diretamente mai hare ha’u nia susar no terus ne’ebé ha’u hasoru durante fulan hitu, laiha duni hahán, laiha duni buat ida naran osan, maibé ida ne’e ha’u agradese tebes ba Na’i Prezidente nia ekipa ne’ebé ohin to iha ne’e, lori osan no ai-han hodi haforsa ha’u nia hamlaha hamrok no ha’u nia susar no terus no no buat ne’ebé laiha, ho ida ne’e ha’u hato’o obrigadu wain ba Na’i Prezidente Repúblika ho nia ekipa, ha’u mós la haluha hato’o agradese tebes ba média Lafaek News ne’ebé sai hanesan mata-dalan ne’ebé mak too uluk iha ne’e,” Leonarda hakotu lia.
Jornalista : Mateus F. de Deus
Editor : Agapito de Deus
