Lafaek News—Prezidente Repúlika José Ramos-Horta, Líder Nasionál, Kay Rala Xanana Gusmão no Ministra Negósiu Estranjeiru no Kooperasaun, Adaljiza Magno hamutuk ho delegasaun selebra tinan 20 Timor-Leste sai membru ba Organizasaun Nasoens Unidas (ONU) ne’ebé hala’o iha sede ONU iha Nova Iorke Estadu Unidus Amérika.
Komunikadu Imprensa ne’e Lafaek News asesu iha Media Gabinete Palasíu Presidensiál iha loron sabadu 24/09/2022 dehan, Timor-Leste sai membru ba ONU iha loron 23 setembru 2002, enkuantu, asembleia jerál ONU vota admisaun Timor-Leste ba ONU iha loron 27 setembru 2002, hafoin restaurasaun independénsia iha 20 Maiu 2002, ne’ebé mai husi rezultadu konsulta popular iha 30 Agostu 1999.
“Timor leste sai membro ba United Nation hahú kedan iha tinan 2002, hamrik ho nia missaun atu tulun nasaun hotu ne’ebé hasoru problema oi-oin inklui mós ba Timor-Leste. Misaun ne’ebé United Nations hala’o ona ba Timor-Leste hanesan iha área edukasaun, sosial, luta kontra direitu feto no labarik feto ne’ebé hasoru problema inklui iha área seluk,” dehan Prezidente Repúblika Josè Ramos Horta hafoin selebra tinan 20 Timor Leste sai membru ONu hala’o iha sede ONU Nova Iorke Estadu Unidus Amérika Sexta ( 23/09/2022).
PR Ramos-Horta orgullu, tanba Timor-Leste hamrik hanesan nasaun soberania ho nasaun sira seluk iha mundu no hetan protesaun makas husi organizasaun internasionál sira ne’ebé sai lutu ba dezenvolvimentu Timor nian iha passadu no ba futuru.
Hafoin Remata serimònia, Prezidente Repúblika, José Ramos-Horta ho delegasaun, kontinua hala’o enkontru biletarál ho Primeira-Ministra Nova Zelándia, Jacinda Ardern no Primeiru-Ministru Kambodia, Hun Sen iha sede ONU, enkontru refere atu reforsa liu-tán kooperasaun bilateral entre Timor-Leste ho Nova Zelándia no Kambodia iha área importante sira ne’ebé atu apoiu Timor-Leste nia dezenvolvimentu.
Entretantu tuir ajenda, Xefe Estadu, José Ramos-Horta sei hala’o enkontru ho Sekretáriu Jerál ONU, António Guterres, iha ONU Nova Iorke Estadu Unidus Amérika.
Jornalista: Rita Moniz
Editór : Agapito de Deus
