Lafaek News—Prezidente Repúblika José Ramos Horta dehan prosesamentu Gáz Natural Liquifeitu – GNL nu’udar assuntu komplexu, maske iha retornu bo’ot husi investimentu.
Asuntu ne’e hato’o husi Xefe Estadu iha loron Sábadu (10/09/2022), bainhira halo vizita instalasaun Gáz Natural Liquifeitu – GNL iha Darwin, ne’ebé mak jere dezde tinan 2006 husi empreza Santos, hodi prosesa gáz husi kampu Bayu Undang.
“Prosesamentu Gáz Natural Liquifeitu – GNL nu’udar assuntu komplexu, maske iha retornu bo’ot husi investimentu ne’e, Iha ne’e mak simu gáz husi Bayu Undang iha tinan hirak ne’e nia laran, iha fatin ida ne’e iha altu nivel teb-tebes, mak depoiz halo liquifeitu, tanba gáz ne’e ho volume bo’ot teb-tebes, entaun tenke kondensa, liu husi mákina sira ne’e hotu, delikadu teb-tebes, alta teknolojia, depoiz ho ró-ahi ba Japaun no osan tama Timor Leste”, deklara Prezidente Repúblika José Ramos Horta Darwin Sabadu (10/09/2022).
Tuir Xefe Estadu RamosHorta, reseita petrolífera mak mak finansia seitor infraestrutura, edukasaun, sosiál no seluk tan iha Timor-Leste.
“Investimentu bo’ot ho teknolojia, fó perigu, risku oi-oin, ho ema matenek ne’ebé halo buat sira ne’e, ita simu osan, iha depoiz osan sira ne’e ita uza hodi investe buat lubuk, ita nia Estrada ba Díli, ba Lospalos, ba Baucau, ba Same, eletrefikasaun, bolsa estudu, ba ema ho difisiénsia, veteranu sira, ba faluk sira ne’e mai husi ne’e” subliña Xefe Estadu.
Relasiona ho produsaun Bayu Undang ne’ebé mak sei remata iha tempu besik, empreza Santos sei lori ba Portu Tibar, ró-ahi ne’ebé hanesan estrutura armajenamentu offshore no halo dezmantelamentu.
“Agora dadaun Bayu Undang atu maran ona no Santos atu monta ekipamentu balun iha Portu Tibar, para fase ekipamentu sira ne’e no fatin ne’e sai bo’ot teb-tebes ba kapturasaun karbonu ne’ebé mak bo’ot liu iha Azia no mós iha mundu” konklui Xefe Estadu.
Vizita Xefe Estadu Ramos Horta ba Austrália mos ko’alia kona-ba dezenvolvimentu Greater Sun Rise ne’ebé durante ne’e paradu, tamba pozisaun politika ne’ebé la hanesan no Austrália hakarak dada Gaz Natural Liquifeitu ba Darwin, enkuantu Timor-Leste hakarak dada gazodutu bá Beasu no Greater Sun Rise lokaliza kilometru 150 husi Kosta Sul Timor-Leste no Kilometru 450 bá Darwin Austrália.
Jornalista : Rita Moniz
Editór : Agapito de Deus
