Lafaek- News—Prezidente Repúblika José Ramos-Horta liu hosi dekretu Prezidénsia Repúblika númeru 14/2024 de 3 de Fevereiro ne’ebé publika iha Jornal Repúblika, ezonera António da Conceição “Kalohan” husi kargu Embaixadór estraordináriu no Plenipotensiáriu RDTL ba Repúblika Indonézia.
Ezonerasaun ne’e bazeia ba kompeténsia Prezidente Repúblika nian ne’ebé hatur iha artigu 87, aliñea b, Konstituisaun RDTL.
“Dekreta no ezonera kargu Embaixadór Estraordináriu no Plenipotensiáriu Repúblika Demokratika Timor-Leste Señór António da Conceição,” sita iha komunikadu ne’ebé Lafaek News asesa, Terça-Feira, (20/02/2024).
Komunikadu ne’e sita katak, K-RDTL artigu 87 atribui ba Xefe Estadu kompetensia ba relasaun internasional, hodi nomeia no ezonera embaixadores, representantes permanente no enviadu extraordináriu, bazeia ba proposta husi governu.
Horta rekorda katak, iha fulan-Dezembru tinan 2023, Xefe Estadu José Ramos-Horta fó pose ba António da Conceição “Kalohan” hodi asume pasta hanesan Embaixadór TL ba RI, baibé iha loron 8, fulan-Janeiru 2024, Tribunál Judisiál Primeira Instánsia Díli nia desizaun finál, kondena Eis-Ministru Turismu Komérsiu Indústria, António da Conceição ho pena prizaun tinan lima, relasiona ho kazu produsaun masin iha Beacou, Postu Atabae, iha tinan hirak liu bá.
Jornalista : Epifania I. Pinto
Editór : Agapito de Deus
