Lafaek News—Prezidente Parlamentu Nasionál (PPN), Aniceto Guterres, segunda (09/11/2020), hasoru malu ho Prezidente Repúblika (PR), Francisco Guterres Lú Olo, hodi relata prosesu orsamentu 2021 ne’ebé tama ona iha Parlamentu Nasionál.
“Hau mai hato’o informasaun liu-liu prossesu orsamentu iha parlamentu nasional ninian ne’ebe agora la’o da-daun i presiza hato’o informasaun tenke koordena,” dehan PPN, Aniceto Guterres ba jornalista sira iha Palasiu prezidente Bairo-Pite, segunda (09/11).
Hodi dehan, liga ho kalendáriu estadu parlamentu nasionál sei halo diskusaun iha jeneralidade no espesialidade hodi hetan aprovasaun husi deputadus sira hafoin lori ba prezidente repúblika sei halo tan estudu perante loron 30 hafoin halo promulgasaun.
Se la la’o tuir nia prazu ne’e bele implika se janeiru mos seidauk promulga karik ka seidauk aprova karik, ne’e nia implikasaun ne’e bele iha tan duadesimu, tan ne’e presiza iha koordenasaun.
“Tanba ne’e mak partilla informasaun atu nune’e orgaun soberania rua liu-liu parlamentu ho prezidente da republika atu tetu didiak iha kalendáriu estadu ninia,” katak PPN Aniceto.
Jornalista Magan : Zeferino Barreto
Editora : Nelya Barros
